سەرۆکی حکومەتی هەرێمی کوردستان بەردی بناغەی نەخۆشخانەی کۆمەڵگەی (هیتوتێ)ی لە قەزای ئامێدی دانا
مەسرور بارزانی:
• به‌رده‌وام ده‌بین له پێشكه‌شكردنی خزمه‌تگوزاریی بۆ ته‌واوی دەڤەرەکانی کوردستان
هه‌ولێر، هه‌رێمی كوردستان، عێراق (GOV.KRD)- رۆژی دووشە‌ممە ٢٠٢٠/٩/٧، مەسرور بارزانی سەرۆکی حکومەتی هەرێمی کوردستان سەردانی قەزای ئامێدی کرد و بە ئامادەبوونی پارێزگاری دهۆک، لە گەڵ قایمقام و بەڕێوەبەری ناحیەکانی دەڤەرەکە کۆبووەوە.
لە کۆبوونەوەکەدا سەرۆکی حکومەت ئاماژەی بە مێژووی پڕ سەروەری خەڵکی دەڤەرەکە کرد کە قوربانییەکی زۆریان لە مێژووی بزووتنەوەی ڕزگاریخوازی گەلی کوردستاندا داوە، بۆیە شایستەی خزمەتکردنی زیاترن.
سەرۆکی حکومەت جەختی لەوە کردەوە کە ئامانجی حکومەت ئەوەیە بێ جیاوازی خزمەتی هەموو شار و شارۆچکە و گوند و دەڤەرەکانی کوردستان بکات. گوتیشی سەڕەڕای قەیرانی دارایی و بڵاوبوونەوەی ڤایرۆسی کۆرۆنا، بەڵام حکومەت بە پێی توانای دارایی بەردەست، لە جێبەجێکردنی پڕۆژە خزمەتگوزارییەکان بەردەوامە و نەوەستاوە.
پاشان سەرۆکی حکومەت بەردی بناغەی نەخۆشخانەیەکی سەد قەرەوێلەیی لە کۆمەڵگەی هیتوتێ دانا کە دەکەوێتە نێوان دێرەلووک و شیلادزێ کە بڕی چل وسێ ملیۆن دۆلاری بۆ تەرخان کراوە.
سەرۆکی حکومەت لە گوتارێکدا جەختی لەوە کردەوە کە حكومه‌تی هه‌رێم حكومه‌تی ئێوه‌یه و له خزمه‌تی ئێوه‌دا ده‌بێت، پێش هه‌موو كه‌س گوتوومانه من و وه‌زیره‌كان و هه‌موو فه‌رمانبه‌رانی حكومه‌ت خزمه‌تكاری ئێوه‌ین و گه‌وره‌ی ئێوه نین، ئێوه گه‌وره‌ی ئێمه‌ن و ئه‌ركی ئێمه‌یە خزمه‌تی ئێوه بكه‌ین.
ئەمەش دەقی گوتاری سەرۆکی حکومەتی هەرێمی کوردستانە:
بناڤێ خودێ یێ مەزن و دلوڤان
ئامادەبوویێن هێژا و قەدرگران، هوین هەموو بخێر بێن سەرچاڤان. ئەز خۆ زۆر ب بەختەوەر دزانم کو جارەکا دی ژی خودێ دەلیڤە دامە سەرەدانا ڤێ دەڤەرێ بکەین. ڤێ جارێ ژبۆ دانانا بەرێ بنیاتێ ژبۆ ڤێ نەخۆشخانێ کو دێ ژ ئالیێ هەردوو کومپانیێن (ڤینس و کورک) هێتە بجیئینان. هیڤیدارم لسەر ئاستەکێ جیهانی و ل دەمەکێ گەلەکێ نێزیک، ئەڤ نەخۆشخانە بهێتە ئاڤاکرن ژبۆ هندێ پتر خزمەتا خەلکێ ڤێ دەڤەرێ بکەت.
د بەرنامەیێن حکومەتێ دا، مە گەلەک گرنگی دایە هندێ کو فەرمانگەهێن حکومی و خزمەتگۆزاری، بگەهنە هەموو ناوچە و دەڤەرێن هەرێما کوردستانێ داکو خەلک نەچار نەبیت بۆ نەخۆشییەکێ یان ژی ژبۆ برێڤەبەرنا کارێن خۆ سەرەدانا سەنتەرێ پارێزگەهێ یان باژێرێن مەزن بکەن. ژ بەر ڤێ چەندێ ژی، مە بڕیار دا ب ئاڤاکرنا نەخۆشخانەیەکی بۆ ڤێ دەڤەرێ چونکی دەڤەرەکا بەرفەهە و خەلکەکێ گەلەک قەهرەمان و تێکوشەر ، ب ساڵان خەبات ل ڤان جهان کریە ژبۆ رزگارکرنا ڤێ دەڤەرێ و نها ژی دەمێ هندێ یە خزمەتا خەلکێ ڤێ دەڤەرێ بکەین هندی مە پێچێبیت، و ئەگەر خودی دەلیڤێ بدەت ب ئانەهیا خودێ تەخسیریێ ناکەین.
ئەڤ پرۆژەیە ئێکە ژ وان پرۆژەیان کو مە لبەرە ژ بۆ ڤی دەڤەرێ و هەموو دەڤەرێن دی یێن دویرەدەست ئەنجام بدەین.
مخابن هەر پشتی دەستپێکرنا کارێ کابینەیێ، ئەم تویشی هندەک قەیرانان بووین، و ئێک ژ ڤان قەیرانان نەخۆشییا پەتایا کۆرۆنایێ یە، و پشتی هنگی کێشەو قەیرانێن ئابووری کو تووشی هەرێما کوردستانێ بوونە هەر وەکوو تووشی گەلەک ژ دەڤەرێ دی و جیهانێ بووین. لێ ئەڤان قەیرانان ئەم نە راگرتین، رەنگە وەکوو پێدڤی و وەکوو مە دخواست، مە نەکاری زوو ژ ڤان پرۆژەیان جیبی بکەین کو دەلیڤە نەبوو چونکی پێدڤی بوو ئەم هەموو بزاڤان بکەین ژبۆ روو ب رووبوونا ڤان قەیرانان و کونترۆلکرنا ڤێ نەخۆشییا ڤایرۆسا کۆرۆنایێ. لێ ئەگەر خودێ دەلیڤێ بدەت دێ دبەردەوام بین لسەر جیبجیکرنا ئەڤان پرۆژەیان ل هەموو ناوچە و دەڤەرێن دی یێن هەرێما کوردستانێ.
ژبۆ ڤێ دەڤەرێ ئەڤە نە پرۆژەیێ بتنێ یە، و ئەڤرۆ مە جڤینەک هەبوو لگەڵ بەرێز پارێزگاری دهۆکێ و قایمەقامی ئامیدیێ و رێڤەبەرێن ناحیێن شێلادزێ و دێرەلووکێ و بامەرنێ و سەرسنکی و چەمانکێ و ڤێ دەڤەرێ هەموویێ، مە کومبوون ئەنجام داین ومە بەحسی پێدڤی و داخوازیێن خەلکێ ڤێ دەڤەرێ یێ کری و ئەگەر خودێ فەرسەندی بدەت یا مە پێچێ ببیت تەخسیریێ ناکەین ژبۆ بجهئینان داخوازیێن وان.
ئەز حەز دکەم بزانن کو جەنابێ سەرۆکی گەلەک پێ خۆشە خزمەتا ڤی دەڤەرێ بهێتەکرن، و هەر وەکوو هوین ژی دزانن کو جەنابێ وی بخۆ گەلەک یێ ل ڤان دەڤەران بووی ل سەدەرمێ پێشمەرگایەتیێ دا و دزانیت قەدر و بەهایێ ڤێ دەڤەرێ چەندە و ئەم یێن تەلکیفکرین و ژبەر وی چەندێ ژی، مە لیژنە یێن پێک ئینان کو بهێن و سەرەدانا دەڤەرێ بکەن داکو بزانن کا پێدڤیێن خەلکێ ڤێ دەڤەرێ چنە داکو ئەم بێخینە د بەرنامێ کارێ حکومەتێ دا و بجهبینین، و ئەگەر خودی حەز کەت، دێ قویناغ ب قویناغ ئەو داخوازی و پێدڤیێن هەوە جێبجێ کەین. رەنگە دەم پێ بڤێت هەتا هەموویان ئەنجام بدەین، و ل دەسپێکێ مە بریار دا ل ناحیا شێلادزێ دەستپێ بکەین و ئەو داخوازیێن هاتینە پێشکەشکرن، ئینشاللا دێ هەموویان جێبجی کەین هەر وەکوو وان ڤییای.
ئەز حەز دکەم لڤێرە، ئاماژێ ب بابەتەکێ زۆرێ گرنگ بدەم. ئەز حەز دکەم خەلکێ ڤێ دەڤەرێ بزانیت کو هوین خۆشتەڤیێن مە نە ئەم قەدرو بەهایێ هەوە دزانین و ئەم دزانین کا هەوە چەند شەهید داینە و چەند زەحمەتی و خەبات کریە و ئەڤ وەڵاتە لسەر دەستێن هەوە یێ هاتییە رزگارکرن و ئاڤەدانکرن. ئەز حەز دکەم بزانن کو هوین خودانێن ڤێ دەڤەرێ نە و ئەو کەسێن دخوازن یان بووینە ئەگەر کو ئەڤ دەڤەرە نە هێنە ئاڤەدانکرن و جارەکا دی دهێن و داخوازێ ژ هەوە دکەن داکو هوین گازندان ل حکومەتێ و دەزگەهێن ئیداری و میری بکەن کو دەستێ ئاڤەدانیێ نەگەهشتییە دەڤەرا بادینان. ئەز حەز دکەم هوین پرسیارێ لێ بکەن کا هوکار و ئەگەر چنە؟. ئەو کەسێن بووینە ئەگەرێ ئاڤەدان نەکرنا 800 گوندان، پیدڤێ یە وازی ژ هندێ بینن کو خەلکی هان ددەن و ئەگەرێن دی ڤەببین بۆ ڤان ئاریشێن ئەڤ دەڤەرە پێ تووش بووی. یان کەسەکی خەما ئێکگرتنا وەڵاتی نەبیت و ئاخڤتنا بکەت و خەلکی بلڤینیت، ئەز حەز دکەم هوین ب خۆ بەرسڤا وان بدەنەڤە، ئاخڤتنێن سڤک و ئەرزان گەلەک دزۆرن، لی ئاخڤتنێن ب کردار دکێمن. رەنگە ئەم زۆر نە ئاخڤین، بەلی ئەو تشتێ ئەم دبێژین، دێ بۆ هەوە جیبجی کەین. ئەز حەز دکەم وی چەندێ ژی بزانن، باشترین کەس ئەگەر حەز بکەت خزمەتا هەوە بکەت دێ ئەو کەس بیت یێ تۆڤێ دووبەرەکیێ دناڤ هەوە دا نە چینیت. ئەو کەسێن داخوازا دوو بەرەکیێ و نە تفاقیێ و نە خۆشی دناڤ هەوە دا بەڵاڤ بکەت، باوەر بکەن چ هیڤی نینە کو رۆژەکێ بشێن خزمەتا هەوە بکەن.
حکومەتا هەرێمێ حکومەتا هەوەیە، یا دخزمەتا هەوە دا، بەرییا هەموو کەسەکی من یێ گۆتی ئەز و هەموو وەزیر و هەموو فەرمانبەرێن حکومەتێ، ئەم خزمەتکارێن هەوەینە و ئەم مەزنێن هەوە نینە، هوین مەزنێن مەنە و ئەرکێ مە یە ئەم خزمەتا هەوە بکەین.
خوشک و برایێن هێژا،
من دڤێت ئەز دیسان ئاماژێ ب بابەتێ نەخۆشیا کۆرۆنایێ بدەم، ل دەستپێکی مە هەموو هەوڵ و بزاڤ دان داکو ئەڤ نەخۆشییە بهێتە کونترۆڵکرن و پێنگاڤێن زۆر یێن باش ژی هاتنە هاڤێتن، لی مخابن ئەو بابەت ژی کرە سیاسی و هەتا ل دژی حکومەتی ژی هاتە بکارئینان و هندەکا هاندانا خەلکی دکر دگۆتە جەماوەرێ کوردستانێ گوهێ خۆ نەدەنێ و چ بنیات بۆ نینە، و ئەنجام ، ئەگەر هوین نها بەری خۆ بدەنێ، کێ باجا ڤان ئاخڤتنا داڤە، هەوە خەلکی ب خۆ باجا وان ئاخڤتنا داڤە و کەسوکارێن هەوە یێن نەخۆش دبن و مخابن چەندان گیانێ خۆ یێ ژ دەست دای.
داخوازا من ل هەوە ئەوە، و هیڤیێ ل وە دکەمن هوین خۆ خۆ بپارێزن چونکی ڤێ گاڤێ ئەڤ ڤایرۆسە یا بەڵاڤ بووی و بتنێ رێکگرتن بۆ کونترلکرنا ڤی ڤایرۆسی ئەوە هوین خۆ خۆ بپاریزن. ل سەرەدانکرنا ئێکودوو، ل بەرچاڤگرتنا دانعەمران، کەسوکار و خۆشتەڤیێن خۆ و خەلکێ دی. هیڤیدارم خۆ بپارێزن ، هیڤیدارم هوین هەموو دسەلامەت بن، دتەندروست و ساخلەم بن، و ئەگەر خۆدی دەلیڤێ بدەتە مە ، یا مە پێ چێببیت، ئەم ژی تەخسیریێ ناکەین ل خزمەتکرنا هەوە. گەرمە ئەز چییێ دی دەمی هەوە ناگرم، و جارەکا دی سوپاسییا هەوە دکەم بۆ ئامادەبوونا هەوە، ئینشاللا هەر دسەرکەڤتی و تەندروست و تەمەن درێژ بن.
