سەرۆکی حکومەتی هەرێمی کوردستان زاخۆی وەک ئیدارەیەکی سەربەخۆ ڕاگەیاند
مەسرور بارزانی : ئیداره‌ی سه‌ربه‌خۆی زاخۆ بۆ ئه‌وه‌یه ئاسانكاری زیاتر بۆ خه‌ڵكی ئه‌م ده‌ڤه‌رە بكرێت.
هەولێر، هەرێمی کوردستان، عێراق (GOV.KRD)- ئەمڕۆ دووشەممە 20ی ئەیلوولی 2021 بە ئامادەبوونی مەسرور بارزانی، سەرۆكی حكومەتی ھەرێمی كوردستان، ڕێورەسمی ڕاگەیاندنی ئیدارەی سەربەخۆی زاخۆ لە شاری زاخۆ بەڕێوەچوو.
سەرۆکی حکومەتی هەرێمی کوردستان لە گوتارێکدا ئاماژەی بە خەبات و قوربانیدانی خەڵکی دەڤەرەکە کرد لە شۆڕشەکانی کوردستان و گوتی زاخۆ ده‌ڤه‌رێكی مێژوویی و خه‌باتگێڕه، خه‌ڵكێكی خه‌باتگێڕ و تێكۆشه‌ری لێیه، له هه‌مانكاتدا یه‌كێكه له ده‌روازه سه‌ره‌كییه‌كانی هه‌رێمی كوردستان. گوتیشی راگه‌یاندنی ئیداره‌ی سه‌ربه‌خۆی زاخۆ بۆ ئه‌وه‌یه ئاسانكاری زیاتر بۆ خه‌ڵكی ئه‌و ده‌ڤه‌ر بكرێت.
ئەمەش دەقی گوتارەکەی سەرۆکی حکومەتی هەرێمی کوردستانە :
بناڤێ خودێ مەزن و دلۆڤان
ماڵباتێن سەربلندێن شەهیدان، پێشمەرگەیێن قەهرەمان، ئامادەبوویێن هێژا..
ئەز گەلەک خوە ب خوەشحال دزانم کو ئەڤرۆ لگەل وە لڤێرە یێ ئامادە مە، لێ ڤێ جارێ ئەم یێن هاتینە ڤێرە ژبۆ هندێ دلێ جەنابێ سەرۆکی خوەش بکەین. بەری نها، جەنابێ سەرۆکی پەیمانا هندێ دا بوو هەوە کو ئیدارەیا سەربخوە یا زاخۆ بهێتە راگەهاندن و ئەڤرۆ ئەم یێن لڤێرە کو پەیمان و سۆزا جەنابێ سەرۆکی بجهـ بینین و راگەهاندنا ئیدارەیا سەربەخوە یا زاخۆ و سەرپەرشتیارێ وێ رابگەهینین. ئیدارەیا سەربەخوە یا زاخۆ ل هەوە هەموویان پیرۆز بیت و هیڤیدارم ئیدارەیەکا خزمەتگوزار بۆ ماڵباتێن شەهیدان و پێشمەرگەیان وهەموو خەلکێ ڤێ دەڤەرێ بیت و دەستپێکەک و قۆناغەکا نوو دەست پێبکەت ژبۆ هندێ بکارین پتر خزمەتا هەوە یێن خوەشتڤی بکەین. باوەر بکەن، دەما ئەز دهێمە زاخۆ، ئەز هەست ب هندێ دکەم کو ئەز دهێمە ناڤ کەس وکارێن خوە. هەست دکەم کو پشتا من گەلەک ب هەوە یا گەرمە. ئینشاڵلا خودێ دێ هەوە هەموویان پارێزیت و دێ ل هەموو دەمان دسەرکەفتی بن و خودێ دەلیڤێ بدەتە مە بکارین پتر خزەتا هەوە بکەین.
زۆر ژ قەهرەمانێن ئەڤرۆ لڤێرە روونشتی، چەندین داستان یێن تۆمارکرین ل هەموو کوردستانێ. شەهیدێن زاخۆ ل هەموو ئاخا کوردستانی خوینا وان یا هاتیە رێژتن ژبۆ پارێزگاریکرنێ ل کوردستانێ و رزگارکرنا کوردستانێ و پاراستنا ڤی ئەزموونێ ژی. لەوڕا ئەم هەموو قەردارێن خەلکێ زاخۆینە و ئەڤ ئیدارەیا سەربەخوە یا زاخۆ وەکوو وەفایەکی یە بۆ زەحمەت و ماندیبوون و خوینا شەهیدان و خزمەتا وە هەموویانە. ب ئانەهییا خودێ دێ ل وە پیرۆز بیت، هیڤیدارم ئەڤ ئیدارەیە بکاریت د ئاستی خزەتا وە دابیت.
رەنگە ژ گەلەک بوارانڤە، ئاسانکاری د ئیدارەیەکا سەبخوەدا باشتر بهێنە کرن چونکی هەر وەکو هوون دزانن دەڤەرا زاخۆ دەڤەرەکا بەرفرەهـە و ژ بۆ برێڤەبرنا کاروبارێن ئیداری هەموو گاڤان ڤەگڕن و بچنە دهۆکێ رەنگە هەندەک یا ب زەحمەت بیت. شۆڕکرنا دەستهەڵاتێ یان ژی راگەهاندنا ئیدارەیا سەربەخوە یا زاخۆ بۆ هندێ یە ئاسانکاریێن پتر بۆ خەلکێ ڤێ دەڤەرێ بهێنە کرن. ئەڤ دەڤەرە دەڤەرەکا دیرووکی و خەباتکەرە و خەلکەکێ خەباتکەر و تێکۆشەر لێ هەیە و دهەمان دەمدا ئێکە ژ دەروازەیێن سەرەکی یێن هەرێما کوردستانێ.
پار ساڵ دەما ئەز هاتیمە ڤێرە و دخزمەتا هەوەدا، وە چەند پرۆژە داخوازکرن چونکی دیاربوو گەلەک کێماسی و کەمتەرخەمی هەبوون ل گەهاندنا خزمەتگوزارییان ل زاخۆ. مە رەزامەندی لسەر هەموو وان پرۆژەیان دا یێن هەوە داخوازکرین کو لڤێرە بهێنە بجهئینان و ئەز گەلەک یێ کەیفخوەشم کو من بهیست زۆر ژ ڤان پرۆژەیان یێن هاتینە بجهئینان و یێن دی ژی دێ هێنە بجهئینان.
پێدڤییە مافێ خەلکێ زاخۆ ژ بۆ خەلکێ زاخۆ ڤەبگەڕێت، داهاتێ هەرێما کوردستانی ب رەنگەکێ ئێکسان بسەر هەموو وەڵاتیێن کوردستانێ بهێتە دابەشکرن و بێگومان و وەکوو دیارمافێ خەلکێ زاخۆ وەکوو خوە نەهاتییە دان، ژبەر ڤێ چەندێ بڕیارا مە ئەوە یا ئەم بکارین بکەین داکو مافێ ڤی خەلکی بەرزە نەبیت و ئەو خزمەتگوزاریێن پێدڤی ل ڤێ دەڤەرێ بهێنە بجهئینان. داخوازێ ژ ئیدارەیا نوو یا زاخۆ دکەم ب هەموو رەنگەکی خزمەتا خەلکێ خۆ بکەت. بەرپرسیارەتی ئیمتیاز نینە و ئەو کەسێ دهێتە دەستنیشانکرن وەکوو سەرپەرشت یان وەکوو بەرپرس ژ بۆ هندێ نینە کو ئیمتیازاتان وەربگریت، بەلکو ژ بۆ هندێ یە کو پتر خزمەتا خەلکێ خوە بکەت. پێدڤییە ئەم هەموو خزمەتکارێن خەلکێ خوە بین چونکی ئەمانەتەکە کەفتییە سەر ملێن مە و ئەڤ ئەمانەتە هەوە یا ب مە کری.
دەڤەرا زاخۆ ژ لایێ گەشتوگۆزاری ژی، دەڤەرەکا گەلەک یا جوان و خوەشە لێ بخابن، ل ئەڤی دەمێ بووری هەبوونا پەکەکێ یا بوویە سەرئێشە و مخابن زۆر ژ گوندیێن مە و وەڵاتیێن مە نکارن ڤەگەڕن سەر گوندین خوە. داخوازا مە ژ هەموو لایەکی ئەوە، سەروەرییا ئاخا مە بپارێزن، قەدرێ زەحمەت و ماندیبوونا خەلکی مە بگرن، رێز و ئیحتیرامێ ل قوربانیێن مە و شەهید و خوینا شەهیدێن مە بگرن. ئەڤ ئاخە ب خوینێ یا هاتییە رزگارکرن، ئەڤ وەڵاتە ب خوینێ یێ هاتییە رزگارکرن، مە زەحمەتەکا گەلەک زۆر دیتییە، و نابیت ئەڤرۆ هیچ کەسەک مافی ب دەتە خۆ و بهێت و دەست درێژیێ بکەتە سەر ڤێ ئاخێ یان ژی زەحمەتێ بۆ خەلکێ مە دروست بکەت. بهیچ رەنگەکی ئەم ژێ قەبوول ناکەین. داخوازێ لێ دکەین ڤەگەڕێنەڤە و ڤێ سەرئێشیێ ب داوی بینن و بهێلن خەلکێ مە بزڤڕنەڤە سەر ئاڤ و خاکا خوە داکو ئەم ژی وەکوو حکومەت پتر خزمەتگوزارییان بۆ وان گوندان و ئەو دەڤەرێن هەتا نها نەهاتینە ئاڤەدانکرن ڤەگەڕینین چونکی جهێن گەلەک خوەشن و دشیان دایە ببنە جهێن سەرنجراکێش نە بتنی بۆ خەلکێ دەڤەرا زاخۆ بەلکو بۆ خەلکێ دهۆکێ بەلکو بۆ هەموو کوردستانێ.
هیڤییا مە ئەوە ئەڤ رەوشە بۆ دۆخەکا ئارام بزڤڕیت و سەقامگیرییا ڤێ دەڤەرێ جارەکا دی ئەم ببینینەڤە و ب ئانەهییا خودێ یا ئەم بکارین تەخسیریێ ناکەین و وەکوو حکومەت یا ب دەستێ مە دا بیت دێ کەین داکو ئەڤ خەلکە جارەکا دی ب ئارامی بژیت و ڤەگەڕێتەڤە سەر ئاڤ و ماڵ و گوندێن خوە.
ئەم بەرەف هەلبژاردنانڤە دچین و وەکو هوین دزانن ئەڤ هەلبژاردنە راستە بۆ پەرلەمانێ عیراقێ نە لێ هەلبژاردنەکا چارەنڤیسسازە چونکی بڕیارێن ل پەرلەمانی دهێنە دان گەلەک جاران کاریگەری و گرنگییا خۆ لسەر رەوشا هەرێما کوردستانێ ژی هەیە. ئەڤ نوونەرێن دهێنە هەلبژاردن بۆ پەرلەمانی عیراقێ کو نوونەراتییا هەرێما کوردستانی دکەن، پێدڤییە بەرییا هەر تشتەکی هزر ل وێ چەندێ بکەن بەرەڤانیێ ژ مافێن دەستووری یێن خەلکی کوردستانێ بکەن، و داخوازا من ژ وە هەموویان ئەوە، چ ئەوێن لڤێرە ئامادە یان یێن نە ئامادە کو رەنگە ل تەلەڤزیۆنێ مە ببینن، داخوازا من ژ هەموو وان خوشک و برایان ئەوە بچن دەنگێ خوە بدەن، پشکداریێ دڤان هەلبژاردناندا بکەن چونکی هزر بکەن ئەگەر هوون دەنگی نەدەن یان کەسەک ببێژیت دەنگدان یا گرنگ نینە یان ژی دەنگێ هەوە چ کاریگەری و باندۆر نینە، باوەر بکەن ژ بەرهندێ یە داکو هەوە پێچێنەبیت ئەو تشتێ هەوە دڤێت بدەستڤە بینن، ئەو نوونەرێن هەوە دڤێن بنێرنە پەرلەمانی، ئەگەر هوون پشکداریێ نەکەن خەلکەکێ دی دێ ل جاتی هەوە دەنگی دەت و رەنگە کەسەکی هەلبژێرن ب هیچ رەنگەکی د خزمەتا هەوە دا نەبیت. هیڤییا من ئەوە بەشداریێ بکەن، دەنگێ خوە بدەن و دەنگی خوە بدەنە وی کەسێ یێ بکاریت بەرەڤانیێ ژ هەوە بکەت. ژیان یا تژی یە ژ ئەڤرازی و نشیڤییان، ژیان بتنێ ئەڤرۆ نینە، ل خوەشیێ زۆر کەس هەنە دەنگێ وان یێ بلندە و دێ هێن و خوە کەنە خوەدانێ کوردستانێ و خوە ب خەمخۆرێن خەلکێ کوردستانێ دزانن. لێ دەما لی دقەومیت، مە ئەو دەنگ نەدیت، دەمێ هندێ دهێت بچنە سەنگەرێ بەرگریێ و خوە بکەنە قوربانی ژبۆ پاراستنا ئەزموونێ و کەرامەتا مللەتێ مە، مە ئەڤ دەڤ وسەروچاڤ و دەنگە نەدیتن ل کیڤە نە و ل کیڤەبوون؟. دەما هوون دەنگی خوە ددەن بیر ل هندێ نەکەن کا ئەڤرۆ هوون چ دبینن، بیر ل هندێ بکەن کا سوبە ئەگەر کوردستان کەفتە بەر ئاستەنگەکێ کی دێ پارێزگارییا هەوە کەت؟ کی یێ ئامادەیە بچیت و خوە بکەتە قوربانی؟ و باوەریێ ب سۆز و بەڵێنێن کەسێ ژی نەکەن، باوەریێ ب وی کەسی بکەن یێن قوربانی داین، باوەری ب وی کەسی بکەن یێ کو خوە بۆ هەوە ئیسباتکری ل تەنگاڤیێ یێ ل هێلا پێشیێ بوو داکو پارێزگاریێ ل سەروەری و کەرامەتا ڤێ ئاخێ و ڤی مللەتی بکەت. ژ بەر ڤێ چەندێ داخوازا من ئەوە هوون وان نوونەران هەلبژێرن یێن کو هەوە قەناعەت پێ هەی، یێن کو بکارن بەرەڤانیێ ژ مافێن دوستووریێن هەوە بکەن و خوە بکەنە قوربانیێن بەرژەوەندیێن مللەتێ خوە و ئاخا خوە و نەچن ژبۆ ئیمتیازات و دەستکەفتێن کەساتی و حزبی هەموو کوردستانێ بکەنە قوربانی. پێدڤییە هوون ڤێ چەندێ ئێکلایی بکەن و ئەز ڤێ داخوازێ نە بتنێ ژ هەوە دکەم لڤێرە ل خەلکێ زاخۆ بەلکو ژ هەموو خەلکێ کوردستانێ دکەم.. بیرکرنەکا جیدی بکەن، باوەر بکەن ئەگەر کوردستان بەرەف رەوشێن نەخوەش بچیت وب ئانەهییا خودێ چ جاران وەلێ نەهێتەڤە، لێ بیر ل هندێ بکەنەڤە و نەهەلخەلتن ب ئاخڤتنێن دو کەسان و ب زانن کا کی هێز و شیانا هندێ هەیە و پێچێ دبیت بەرەڤانیێ ژ هەوە بکەت و ئەگەر بەڵینەکێ ژی بدەنە هەوە ، لێ ئەرێ راستە وانا شیان هەنە وان بەڵێنان بجهبینن؟ ئاخڤتن ب ساناهینە، لێ کار و کردار ل بەرییا هەر تشتەکی پێدڤییە لبەر چاڤێن هەوە بن و بزانن کا کی یێ وەفادارە بەرامبەری خوینا شەهیدێن هەوە و بەرامبەری ئەڤی ئەزموونێ و بەرامبەری ئەوان مافێن نەتەوەیی و نیشتیمانی یێن کو هێشتا زۆر ژ وان ماینە بدەستڤە بهێن.
من نەڤێت ئەز پتر وەختی وە بگرم، لێ من داخوازەکا دی ژی ژ هەوە هەیە، هێشتا ئەڤ پەتایا کۆرۆنایێ بەرەف دووماهێێ نەچۆیە، هیڤییا من ئەوە خوە بپارێزن، هوون گەلەک د عەزیزن و ئەم حەز دکەین هوون هەموو د تەمەن درێژ بن، دتەندروست بن و دساخلەم بن، خوە بپارێزن و کەس و کەس و کارێن خوە بپارێزن، ئینشاڵا ئەڤ قەیرانە ژی دێ بسەر مە دا دەرباز بیت. هەرچەندە زۆر هەوڵ هاتنە کرن داکو ئەم شکەستی بینین، ئەڤ حکومەتا مە تووشی شکەستێ ببیت ل روویێ ئابووری و سیاسیڤە و هندەک جاران ژی کێشەیێن ئەمنی ژی ئینانە پێش داکو ئەڤ حکومەتە رادەست ببیت و دەستبەرداری مافێن خوە یێن دەستووری بینیت، دەستبەرداری مافێن ڤی خەلکی بینین بۆ خاترا مووچەی بۆ خاترا هندەک ئیمتیازاتێن گەلەک یێن دەمکی و کێم کو ئەو ژی ل جهێ باوەریێ نەبوون بهێنە بجهئینان. خودێ فەرسەند دا و خوەدێ پشتەڤان بوو و ب خوەراگرییا هەوە، و گەلەک سوپاسییا هەوە دکەم هوون گەلەک د خوەراگر بوون و لگەل مە راوەستان وپشتەڤان بوون بۆ هندێ ئەم سازشێ ژ هیچ مافەکێ خوە نەکەین و ئەڤ قەیرانە ژی هەتا نها مە یا ئیدارەکری ومە یا تێپەڕاندنی و ئینشاڵلا ئاسویێن گەلەک روون یێن ل پێش مە، بەرنامێن گەلەک باش یێن ئابووری ل پێشییا مە هەنە داکو ئەم بکارین کوردستانێ بەرەف قوناغەکا گەشتر و ئاڤادانترڤە ببەین و ئەڤێ چەندێ پێدڤی ب هاریکارییا هەوە هەموویان هەیە. ئێک ژ کارێن مە بۆ راگەهاندنا ئیدارەیا سەربەخوە یا زاخۆ کری، بۆ هندێ یە داکو یا هەڤکار بیت بۆ خزمەتکرنەکا پتر و ژێرخانەیەکا ئابووری یا باشتر ل ڤێ دەڤەرێ ژی هەبیت. ئەم چ سۆز و بەڵێنەکێ نادەین ئەگەر د شیان و هێزا مە دا نەبیت ئەم دێ وێ سۆزێ دەینە هەوە کو د وەفادار بۆ هەوە ، د راستگۆ بین بۆ هەوە و یا مە پێچێ ببیت و یا مە د شیان ژی دابیت بۆ هەوە تەخسیریێ نەکەین.
جارەکا دی د سەرکەفتی وسەرفەراز بن و سەربخوەبوونا ئیدارەیا زاخۆ ژی ل هەوە پیرۆز بیت. زۆر زۆر سوپاس
