سەرۆکی حکومەت لە ڕێورەسمی کردنەوەی کۆرنیشی دەلال لە زاخۆ : دەستبەرداری مافە دەستوورییەکانمان نابین

ئەمڕۆ دووشەممە 8/14 مەسرور بارزانی سەرۆکی حکومەتی هەرێمی کوردستان، لە ڕێوڕەسمێکی تایبەتدا لە شاری زاخۆ، پڕۆژەی گەشتیاری کۆرنیشی دەلالی کردەوە.
سەرۆکی حکومەت لە گوتارێکدا ئاماژەی بەوە دا کە ئەمە تاكە پڕۆژە نییە، بەڵكوو لە سنووری ئیدارەی سەربەخۆی زاخۆ، چەندین پرۆژەی دیكە لە کەرت و بوارە جۆراوجۆرەکاندا، ئەنجامدراون یان ئێستا لە جێبەجێکردندان. کە بە گشتی، زیاتر لە 170 پرۆژە لەم ماوەیەدا جێبەجێ كراون.
ئەمەش دەقی گوتاری سەرۆکی حکومەتی هەرێمی کوردستانە:

بەناوی خوای مەزن و دلۆڤان
خوشك و برایانی هێژا
ئامادەبووانی قەدرگران، گەلەك بەخێر بێن

من زۆر خۆشحاڵم كە ئەمڕۆ لەگەڵ ئێوە لێرە بەشدارم بۆ كردنەوەی ئەم پرۆژە گرنگ و جوانە كە لە ماوەیەكی زۆر كەمدا جێبەجێ كراوە. پیرۆزبایی لە ئێوە و خەڵکی زاخۆ و هەموو خەڵكی كوردستان دەكەم، هیوادارم سوودی لێ ببینن و ببێتە جێی ڕەزامەندیی هەمووتان. سوپاسی كۆمپانیای جێبەجێكار و ئیدارەی سەربەخۆی زاخۆ و سوپاسی خەڵكی زاخۆ دەكەم بۆ پشوودرێژی و هاوكارییان، هیوادارم ڕۆژ لە دوای ڕۆژ پرۆژەی زیاتر لە زاخۆ و ئەم دەڤەرە و هەموو ناوچەكانی كوردستان جێبەجێ بكرێن.
بۆ من جێی دڵخۆشییە كاتێك دەبینم ئێمە پێشوەختە هەندێك پەیمان دەدەین، پاش ماوەیەك دێین و دەبینین ئەو پەیمان و بەڵێنانەی ئێمە بۆ جێبەجێكردنی ئەو پرۆژە و بەڵێنانە داومانە، ئەنجامیان هەیە و ئێمە بەشدارین لە كردنەوەی ئەم پرۆژانە.
وەك دەزانن ئەمە تاكە پرۆژە نییە، بەڵكوو لە زاخۆ چەندین پرۆژەی دیكە كراون وەك كردنەوەی رێگە و شەقام و هەندێك پرۆژەی دیكەی گرنگ لەم دەڤەرە وەك نۆژەنكردنەوەی بازاڕی كۆنی زاخۆ كە هیوادارم بۆ ئەویش كاتمان هەبێت و سەردانێكی بكەین و ئەویش ببینین.
بە گشتی، وەك بزانم زیاتر لە 170 پرۆژە لە سنووری ئیدارەی سەربەخۆی زاخۆ لەم ماوەیەدا جێبەجێ كراون. ئێمە لە بەرنامەماندایە لە قۆناغی داهاتوودا گەلێك پرۆژەی دیكەش ئەنجام بدەین یەك لەوانە دروستكردنی شەقامی 60 مەترییە، هەروەها ئەو مزگێنییەشتان پێ دەدەین كە ئێمە لە دروستكردنی كۆڕنیشی زاخۆ بەردەوام دەبین هەتا ڕووباری خابوور لە زاخۆ تەواو دەبێت، پشت بەخوا هەموو قۆناغەكانی دیكەش جێبەجێ دەكرێن.
هەروەها بەنداوی زاخۆ لە خابوور دروست دەكرێت، ئەویش پرۆژەیەكی گەورە و ستراتیژییە و هەر كاتێك دیزاین و بەرنامەی ئەوێش تەواو بوو، ئەویش دەكەوێتە بواری جێبەجێكردنەوە، بێگومان ئەویش سوودێكی زۆری بۆ خەڵكی زاخۆ و خەڵكی هەموو كوردستانیش دەبێت.
زاخۆ شارێكی گرنگە بۆ ئێمە، نەك تەنیا لەبەر ئەوەی باژێڕێكە لەسەر سنووری هەرێمی كوردستان و دەروازەیەكە بۆ پەیوەندی لەگەڵ توركیا و ئەورووپا و جیهان، بەڵكوو باژێڕێكە هەمیشە و هەموو دەم پاڵپشت و پشتیوان بووە بۆ پاراستنی هەرێمی كوردستان و قارەمانی زۆر مەزن لە زاخۆ هەن و ئەم دەڤەرە گەلێك شەهیدیان داوە، بەداخەوە زۆر لەوانە ئەمڕۆ لێرە نین، هەرچەندە ئێمە لە نزیكەوە دەیانناسین، بەداخەوە لێرە نین، بەڵام ئێمە سەری ڕێز و نەوازش بۆ ئەوان و بنەماڵەی سەربەرزی شەهیدان و ئەو پێشمەرگە قارەمانانە دەچەمێنین كە ئەم كارە لە سایەی سەری ئەوان و خەباتی ئەوان ئەنجام دراوە.
من حەز دەكەم ئەوەش بڵێم كە بەڕاستی من زۆرم پێ خۆش بوو كە ئێمە دڵی جەنابی سەرۆكیش لە خۆمان ڕازی بكەین، جا هیوادارم ئێوەش لێمان ڕازی بن تاوەكوو دڵی جەنابی سەرۆك لێمان ڕازی بێت.
ئێمە گەلێك زەحمەتیمان دیت، چ وەكوو میللەت و چ وەكوو ئەم كابینەیەش، گەلێك ئاستەنگ لە ساڵی رابردوو بۆمان دروست كران، لە بواری ئابووری، سیاسی، هەندێكجار هەندێك كێشەی ئەمنیشیان بۆمان دروست كرد تاوەكوو ئێمە نەتوانین بەردەوام بین لە گەیاندنی خزمەتگوزاری بۆ خەڵكی خۆمان لە هەموو دەڤەرەكانی كوردستان، بەڵام سوپاس بۆ خوا و خۆڕاگریی خەڵكی قارەمانی كوردستان، ئێمە بەردەوام بووین و سەری خۆمان بۆ هیچ ناحەز و فشار و ئاستەنگێك نەچەماند و توانیمان ئەم قۆناغانە تێپەڕێنین و هەندێك لەو پرۆژانەش جێبەجێ بكرێن.
بۆ ئێمە جێی شانازییە و مەزنترین شانازی بۆ من ئەوە بووە كە خەڵكی كوردستان پاڵپشتیی ئێمە بوون، پشتیوانیی ئێوە هێزیان دا بە ئێمە، پشتیوانی و خۆڕاگریی ئێوە هێزیان دا بە ئێمە تاوەكوو بتوانین بەرامبەر بەو هەموو فشارەی كە هاتوونەتە سەر حكومەتی هەرێمی كوردستان، ڕاوەستین، بۆیە هیوادارم ئەو پشتیوانییانە بەردەوام بن تاوەكوو ئێمەش ئەوەی پێمان دەكرێت لە خزمەتكردنی ئێوە، بەردەوام بین.
دەمەوێ سوود لەم دەرفەتە وەربگرم بۆ ئەوەی هەندێك باسی دۆخی كوردستانیش بكەم، لەم ماوەیەی رابردوو ئێمە چەند شاندمان ناردە بەغدا تاوەكوو گفتوگۆ بكرێت چ لەسەر بابەتی هەناردەكردنی نەوتی هەرێمی كوردستان بۆ دەرەوە و چ لەسەر بابەتی بودجە كە بەداخەوە چەندین ڕێككەوتنمان كرد لەگەڵ سەرۆك وەزیران و حكوومەتی فیدڕاڵی، بەڵام پاشان ئەو ڕێككەوتنانە وەلا نران یان دەستكاریی كران و هەندێك بیروبۆچوونی دیكەیان لەسەر خەڵكی كوردستان سەپاند، سەرەڕای ئەوەش ئێمە دیسان هەوڵمان دا و هەوڵیش دەدەین كە تا دوایین قۆناغ لەگەڵ بەغدا بگەینە ئەنجامێك كە بەرهەمەكەی لە خزمەتی هەموو خەڵكی عێراق و بە تایبەت لە خزمەتی هەرێمی كوردستاندا بێت، بەبێ ئەوەی ئێمە هیچ سازشێك لەسەر دەستكەوت و شایستە و مافە دەستوورییەكانمان بكەین. ئێمە بەردەوام دەبین بۆ ئەوەی پارێزگاری لە مافە دەستوورییەكانمان بكەین، بەردەوامیش دەبین بۆ ئەوەی لەگەڵ حكومەتی عێراق بگەینە ئەنجامێكی ئاشتییانە و ئەو كێشانەی هەن، چارەسەر بكەین. لە ڕۆژانی داهاتووش جارێكی دیكە شاندی ئێمە دەچێتەوە بەغدا بۆ گەیشتن بە ڕێككەوتن لەسەر بابەتی ناردنی بودجە. هەروەك دەزانن پێشتر گازاندەی ئەوە دەكرا كە حكومەتی هەرێمی كوردستان مووچە نادات یان لە كاتی خۆی مووچەی نەداوە، دەمەوێ ئەوە بڵێم كە هەتا ڕێگری لە هەناردەكردنی نەوتی كوردستان كرا، حكوومەتی هەرێم بە شانازییەوە هەموو مانگێك مووچەی خەڵكی كوردستانی دابین كردووە. بە خۆشی بووبێت و بە زەحمەت و هەر جۆرێك بووبێت، بەڵام ئێمە ئەو بەرپرسیاریەتییەمان لە ئەستۆ گرت و لە خزمەتی خەڵكی خۆمان بووین. ئێستاش ئەو فشارەی لەسەرمانە دیسان ڕەنگە بۆ ئەوە بێت كە ئێمە واز لە هەندێك مافی دەستووریی خۆمان بێنین، بەڵام من دەمەوێ دڵنیاتان بكەمەوە كە ئێمە واز لە مافە دەستوورییەكانمان ناهێنین، بە پشتیوانیی ئێوە و خوای گەورە، بەردەوام دەبین لە داكۆكیكردن لەسەر هەموو مافەكانی خۆمان و گەشبینیشم بەوەی دەگەینە ئەنجامێكی باش لەگەڵ ئەم حكومەتەش، تا ئەوانیش بودجە لە كاتی خۆیدا بۆ خەڵكی هەرێمی كوردستان بنێرن و بابەتی بودجەش نەكەنە بابەتێكی سیاسی و تێكەڵی كێشەی سیاسی نەكەن كە هەندێكجار بەداخەوە پاساوی بێ مانامان بۆ دێننە پێش.
بە هەرحاڵ، ئێمە هێزی خۆمان لە ئێوەوە دەبینین، پشتیوانیی خوا و پشتیوانیی ئێوە بۆ ئێمە بەهێزترین هێزە، ئێمە خۆمان بە خزمەتكاری ئێوە دەزانین.
جارێكی دیكەش سوپاس بۆ ئامادەبوونی ئێوە و هەر سەركەوتوو و سەلامەت بن و كوردستانیش هەر ئاوەدان بێت.