سەرۆکی حکومەت: ساڵانە زیاتر لە حەفتا ملیار دینار بە مەبەستی دابینکردنی چارەسەرکردنی نەخۆشییەکانی شێرپەنجە خەرج دەکرێت

ئەمڕۆ دووشەممە 11/6، مەسرور بارزانی سەرۆکی حکومەتی هەرێمی کوردستان، بەردی بناخەی سەنتەری چارەسەری نەخۆشییەکانی شێرپەنجە بە تیشک LINAC Radiotherapy لە دهۆک دانا.
لە ڕێورەسمەکەدا سەرۆکی حکومەت گوتارێکی پێشکەش کرد و تێێدا ئاماژەی بەوە دا کە حکومەتی هەرێمی کوردستان، ساڵانە زیاتر لە حەفتا ملیار دینار بۆ خەرجیى دەرمان و پێداویستی پزیشکی چارەسەرکردنی نەخۆشییەکانی شێرپەنجە تەرخان دەکات. گوتیشی کار دەکەین بۆ ئەوەی خزمەتگوزاریى تەندروستیى گشتی لە کوردستان باشتر بکات.

ب ناڤێ خودێ مەزن و دلۆڤان
ئامادەبوویێن رێزدار:
رۆژ باش
ئەڤرۆ ئەز گەلەک خۆشحالم، کو بەرێ بنیاتی بۆ ڤی سەنتەرێ گرنگ ل باژێڕێ دهۆکێ دادنێین، کو ئێکەمین سەنتەرێ چارەسەرکرنا تویشبوویێن نەخۆشییا پەنجەشێرێ یە ل دهۆکێ و ئێکەم جارە ئەڤ خزمەتە لێرە دهێتە دابینکرن، ئەویش ژی چارەسەرکرنا ب تیشکێ یە ((LINAC Radiation، داکو هەڤوەڵاتیێن خۆشتەڤی ل سنورێ پارێزگەها دهۆکێ، پێدڤی ب هنارتنێ نەبیت بۆ دەرڤەی وەلاتی یانژی بۆ باژێڕێن دی.
هیڤیدارم، ئەڤ پرۆژەیە ل دەمێ خۆ و ب کوالیتەکا باش و ئاستەکێ بلند بهێتە تەمام کرن. سوپاسیا کۆمپانیا ئیگل کراون دکەم بۆ جیبەجی کرنا ڤی پرۆژەی کو ئەرکەکێ پیرۆزە و هیڤیدارم جهێ مفایا هەمی خەلکێ دهۆکێ و کوردستانێ بیت.
ئەڤرۆ، نەخۆشی یێن پەنجەشێرێ ل جیهانێ ئاریشەیەکا مەزنە و زێدەباری پێشکەڤتنێن باش ل بوارێ نۆژداریێ، بەلێ مخابن، هەر ساڵ ب ئەگەر و فاکتەرێن جودا، ژ وان گوهۆڕینێن ژینگەیێ و شێوازێ ژیانێ و جینات و خارنێ و زوی دەستنیشان نەکرن و دیتنەڤا حالەتان، ب میلیۆنان ژ خەلکی جیهانێ گیانێ خۆ ژ دەست ددەن.
ل هەرێما کوردستانێ، چەندین نەخۆشخانە و سەنتەرێن چارەسەرییا پەنجەشێرێ هەنە، کو هەیڤانە هزاران کەس ب مەرەما چارەسەریێ سەرەدانا وان دکەن، نەمازە خەلکەکێ زۆر ژ ناوچەیێن دەرڤەی هەرێما کوردستانێ ژی، ژ پارێزگەهێن دی یێن عیراقێ سەرەدانا ئەڤان سەنتەر و نەخۆشخانا دکەن.
بێگومان چارەسەرکرنا تایبەت یا پەنجەشێرێ خەرجییا وێ گەلەکە، ل بەر هندێ ل وەڵاتین پێشکەڤتی، زۆر ژ دامودەزگەهـ و رێکخراوێن خێرخاز و کەسایەتی، هاریکاری و پشتەڤانییا ماددی یا سەنتەرێن نەخۆشێن پەنجەشیرێ دکەن.
ل هەرێما کوردستانێ، مە یاسایەکا تایبەت هەیە بۆ سندۆقا هاریکاریێ (کۆمەکێ) بۆ تویشبوویێن پەنجەشێرێ. ب رێکا ڤێ سندۆقێ، هەر ساڵ پتر ژ ٧٠ ملیار دیناران، خەرجی بۆ مەرەما دەرمان و ئامیر و پێدڤیێن پزیشکی بۆ نەخۆشێن پەنجەشێرێ دهێتە دابینکرن.
نوکە ل هەرێما کوردستانێ شیانێن پزیشکی و زانستی و هەر خزمەرگوزارییەکا دی یا گرێدایی ب چارەسەرییا پەنجەشێرێ، دبەردەستن و ئەم بۆ وێ چەندێ کار دکەین داکو ل پاشەڕۆژێ ژی ئەو خزمەتگوزاری بهێنە بەرهەڤ کرن.
لێرە، ب پێدڤی دزانم دەستخۆشیێ ل وەزارەتا تەندروستی و سندۆقا کۆمەکێ بۆ توێشبوویێن پەنجەشێرێ و تەڤایا نەخۆشخانە و سەنتەرێن چارەسەرییا پەنجەشیرێ و هەموو پزیشک و کارمەندێن ئەڤی بواری بکەم و من رێز و حورمەت هەنە بۆ ئەرک و ماندیبوونا وان.
ل ساڵین بۆری، ل گەل هاتنە پێشا چەندین قەیرانان ژ رەنگێ کۆرۆنایێ و قەیرانا دارایی و نەهنارتنا پشکا بۆدجەیا هەرێما کوردستانێ ژ لایێ حکومەتا فیدراڵڤە، بەلێ وەزارەتا تەندروستی یا حکومەتا هەرێما کورستانێ ل گۆری شیانێن دارایی یێن بەردەست، بەردەوام بزاڤا باشترکرنا خزمەرگوزاریێن تەندروستییا گشتی کریە.
داخازێ ژ حکومەتا فیدرال دکەین، کو ژ رویێ دابینکرنا دەرمان و ئامیر و و پێداویستیێن پزیشکی پتر یا هەڤکار و هاریکار بیت بۆ حکومەتا هەرێمێ، ب تایبەتی بۆ ئاوارە و پەنابەرێن ئاکنجی ل هەرێما کوردستانێ.
ئەز وەڵاتیێن خۆشتەڤی یێن هەرێما کوردستانێ پشتراست دکەینەڤە، کو حکومەتا هەرێمێ دێ یا بەردەوام بیت ل پشتەڤانیکرنا نەخۆشێن پەنجەشێرێ و باشترکرنا خزمەتگوزاریێن تەندروستییا گشتی و پێشکەشکرنا چارەسەریێ و بەرفرەهترکرنا خزمەتگوزارییان بۆ نەخۆشێن پەنجەشێرێ ل دەرڤەی سەنتەرێن باژێڕان.
هەر وەتۆڤ، داخازێ ژ رێکخراوێن ناڤخۆیی و نێڤدەولەتی و کەسایەتیێن خێرخاز و هەر دەستپێشکارییەکا مرۆڤدۆستانە دکەین، کو هەڤکاری و پشتەڤانییا نەخۆشێن پەنجەشێرێ و نەخۆشخانە و سەنتەرێن چارەسەرییا ئەڤێ نەخۆشیێ بکەن.
هەر وەسا، داخازێ ژ هەڤنیشتمانێن رێزدار دکەین، کو پێخەمەتا سەلامەتییا خۆ و خێزانێن خۆ، رێنمایێن تەندروستی ل بەرچاڤ وەربگرن و ژیانەکا تەندروست و خارنەکا هەژی و تەندروست بۆ خۆ هەلبژێڕن، پاراستن و پاقژییا ژینگەهێ بپارێزن و ب شێوەیەکێ رێکخستی وەرزشێ بکەن و زوی خۆ بپشکنن داکو زوی دەستنیشانکرنا هەر گرفتەکا تەندروستی بهێتەکرن بۆ خاترا ژیانەکا رەحەت و ب سەلامەت و دویر ژ نەخۆشیێ.
ل دویماهیێ، هیڤییا سەلامەتی و چێ ڤەبوونا ب لەز بۆ تویشبوویێن نەخۆشییا پەنجەشێرێ دخازین و وان پشتراست دکەینەڤە، کو هەر چیێ مە پێچێ ببیت بۆ چارەسەرکرن و هەڤکاریکرنا وان، تەخسیریێ ناکەین.
ئێدی هەر شاد و ساخله‌م بن وکوردستان هەر یا ئاڤەدان بیت.