سەرۆکێ حکومەتێ؛ حکومەتا هەرێما کوردستانێ، ل گور شیانێت خۆ هندەک گاڤ ژ بۆ روی روی بوونا دیاردەیا گوهۆڕینا کەشوهەوای هاڤێتینە

ئەمڕۆ دووشەممە 6/3 ، مەسرور بارزانی سەرۆکی حکومەتی هەرێمی کوردستان ، لە ڕێورەسمێکی تایبەتدا، بەردی بناخەی هەردوو پارکی ( ئاڵۆکا ) و سەرهەڵدان ( بەرۆشکێ) ی لە دهۆک دانا.

سەرۆکی حکومەت لە گوتارێکدا ، جەختی لە گرنگیی پەرەپێدانی کولتووری ژینگەپارێزی و زیادکردنی ڕووبەری سەوزایی کردەوە و ئاماژەی کرد کە کابینەی نۆیەمی حکومەتی هەرێمی کوردستان بە پێی توانا، کاری بۆ ڕووبەڕووبوونەوەی لێکەوتە نەرێنییەکانی گۆڕانی کەش و هەوا کردووە.
ئەمەش دەقی گوتاری سەرۆکی حکومەتە :

بناڤێ خودایێ مەزن و دلوڤان

ئامادەبوویێت هێژا

ئەز گەلەك خۆشحاڵم كو جارەکا دی ژی، ئەم ل دهۆکێینە بۆ دانانا بەرێ بنیاتێ چەند پرۆژە، ژ وانا ژی هەردو پاڕکێت ئالوکا و بەڕۆشکێ، بەری چەند رۆژاش ئەم ل دەڤەرا سۆران بوین، ل وێرێش بۆ دانانا بەرێ بناغێ بۆ دوو پاركێت گرنگ. ئەڤەش نیشانە پێداگیرییا مەیە بۆ جوانتركردن و ساخلەمتر كردنا باژێرێت مە.
ئەڤ دوو پاركێت ناڤا دهوكێ، چەندین خزمەتگوزاریێن باش ل خۆ دگرن و خزمەتەکا باش دێ گەهیننە ئاکنجیێن دهۆکێ و بەر و رویبەرێ ڤان پاڕکان زۆر یێ بەرفرەهە، هیڤیدارم ئەڤ پاڕکە ببنە جهەکێ باش بۆ دەم بۆراندنێن خۆش، هەر وەتۆڤ تەمامبوونا وان دێ دیمەنەکێ دلڤەکەر دەتە دهۆكا رەنگین و كاریگەری ل سەر سەقایا ناڤا دهوكێ هەبیت.

مخابن ل رویێ کەسکاتیێڤە هەرێما کوردستانێ هێشتا د ئاستێ پیڤەر و ستانداردێن جیهانی ژی دا نیە، هەرچەندە پارێزگەها دهۆکێ د ڤێ چەندێ دا ل دەڤەرێت دی باشترە. لێ پێدڤییە گرنگییەکا گەلەک پتر ل زێدەکرنا بیاڤێ کەسکاتیێ ل هەرێما کوردستانێ ب گشتی بدەین.

کابینەیا نەهێ یا حکومەتا هەرێما کوردستانێ، رێنمایێت پێدڤی دەرئێخستینە ژ بۆ زێدەکرنا رویبەرێ کەسکاتیێ و چاندنا شتلێن داروباران ل دەمێ ئەنجامدانا پرۆژەیان ب تایبەتی ل جهێن ئاکنجیبوونێ.

دو رۆژێن دی رۆژا جیهانی یا ژینگەهێ یە، ڤێ دەلیڤێ ب پێدڤی دزانم کو داکۆکیێ ل پێگیرییا حکومەتا هەرێمێ بکەم بۆ بابەتێ ژینگەهپارێزیێ، کو پێدڤییە نە بتنێ ئەرکێ حکومەتێ بیت بەلکی پێدڤییە خەما مە هەموو هاووڵاتیا بیت.

خودایێ مەزن سروشت و ژینگەهەکێ جوان یێ دایەمە، پێدڤییە بپارزین و ب پاکژی رابگرین و وێ بکەین کو نەڤی و جیلێ داهاتیش مفای لێ وەربگرن.

مە ل حکومەتا هەرێما کوردستانێ، ل گور شیانێت خۆ هندەک گاڤ ژ بۆ روی روی بوونا دیاردەیا گەرمبوونا ئەردی و گوهۆڕینا کەشوهەوای یانکو سەقایی هاڤێتینە، ل دویڤ لێکدانەڤەیێن زانا و بسپۆرێن ڤی بیاڤی، دەڤەرا مە دێ ئێک بیت ژ وان دەڤەرێن کو ب دژواری دێ کەڤیتە ژێر کاریگەریێن گوهۆڕینا کەشوهەوای، لەوا مە دەست ب هندەک ئامادەکاری و پێڕابوونێن پێدڤی کریە داکو بەرەنگاری کاریگەریێن نەرێنی یێن گوهۆڕینا کەشوهەوای پێ بکەین، بۆ نموونە هەوڵدان بۆ كۆنتڕۆڵكردن و بەكارئینا گازێت كو ل بیرێت نەفتیدا دەردكەڤن، دروستکرنا چەند سکر و بەنداڤان و کارکرن بۆ ڤەژاندنەڤا دارستانێن کوردستانێ بەلێ پێدڤییە گاڤێن پتر بهاڤێژین. وەیا ل هەمیا گرنگتر ئەوە كو فەرهەنگ و كلتوورێ ژینگەپارێزیا ل ناڤ گەلێ خۆ بهێز بكەین و بۆ ڤێ چەندێ، ڕۆڵێ ڕاگەیاندن و پەروەردە و رێكخراوێن كۆمەڵگەهێن مەدەنی و ب تایبەت رۆڵێ خێزانێ و ماڵباتێ گرنگە.

لێرەدا ب پێدڤی دزانم کو حکومەتا فیدرال ل ڤێ چەندێ هەڤکار و هاریکار بیت داکو پێکڤە روی ب روی کاریگەری و ڤەڕێژێن گوهۆڕینا کەشوهەوای ببین.

بەرێزان:

هنگ د ئاگەهدارن، هەفتییا چوویی مە سەرێدانا بەغدا کر و ل گەل بەرێز سەرۆک وەزیرێن فیدرال و بەرپرسێن دی یێن حکومەتێ و سەرۆک و بەرپرسێن هێز و لایەنێن سیاسی یێن عیراقێ کۆمبوون و دانوستاندن ب رەنگەکێ زۆر ئاشکرا و رۆهن ل گەل وان کرن سەبارەت پێدڤییا چارەسەرکرنا بنەرەتی یا ئاریشە یێن دناڤبەرا هەرێما کوردستانێ و حکومەتا فیدرالدا، ئەوێت هەتا نوكە مایی.
ل وێرێ ژی، من بۆ پترییا لایەنێن سیاسی و بەرپرسێت حکومەتا فیدرال دیار كر، کو جهێ داخێ و دلتەنگیێ یە، كو هەتا نوکەش ئەم دانوستاندن ل سەر بابەتێت مووچەی و ئەو قەیرانێت كو مایی دناڤ حكومەتا هەرێما كوردستانێ و حكومەتا فیدڕاڵی دكەین، کو پێدڤییە ئەڤە مافەکێ سروشتی بن و نەبنە نۆچەیێ راگەیاندنێ. بەلێ خۆزی ل باتی وێ، کو پێدڤی ئەو بوو دانوستاندن، سەبارەت ب رێک و چەوانییا پێشئێخستنا عیراقێ و هەرێما کوردستانێ بن، كو ركەبەریی لەگەڵ وڵاتێت كەنداو و وڵاتێن دیێن جیهانێ بكەین، چەوا ئەم پێ چێ بین وڵاتێ خۆ ل هەموو بوارەكێدا بەرەوپێشتر ببەین. وەلاتەکێ مە وەڵاتەكا دەولەمەندە، سامانێ مرۆڤی و سامانێن سرۆشتی و ماددی مە گەلەك زۆرن، بتنێ مە ئیدارەکرنەکا باشتر دڤیتن بو هەندێ ئەم پێ چێبن بگەهینە ئاستێ وەڵاتێن پێشکەفتی.

هیڤیدارم چیێ دی دەمێ خۆ بۆ دروستکرنا گرفت و ئاریشە و ناکۆکییان خەسار نەكەین، ئەم هەمو بەریكانی بكەین بۆ هەندێ پتر خزمەتكرنا هاوولاتیێت خۆ، بۆ پێشهێخستنا ئاڤەدانیا وڵاتێت خۆ بكار بینین.

ئیدی هەر شاد و سەرکەفتی بن، کوردستانیش هەر یا ئاڤەدان بیت. هێڤیدارم ئەم پاركەش ل هەنگو هەموویا پیرۆز بن و د خزمەتا هەموو هاووڵاتیاندا بن. گەلەك سوپاس بۆ ئامادەبوونا وە هەموویا. 
سوپاس.