سەرۆکی حکومەت: ئامانجی سەرەکیی حکومەتی هەرێمی کوردستان خزمەتکردنی هاووڵاتییانە

ئەمڕۆ یەکشەممە 7/20، مەسرور بارزانی، سەرۆکی حکومەتی هەرێمی کوردستان، قۆناخی یەکەمی پڕۆژەی فریاگوزاری خێرای گەیاندنی ئاوی بۆ شاری هەولێر كردەوە.
لە گوتارێكدا كە لە ڕێورەسمی كردنەوەی پرۆژەكە پێشكەشی كرد، سەرۆكی حكوومەتی هەرێمی كوردستان سوپاسی هەر لە كۆمپانیای جێبەجێكاری پڕۆژەكە ( هێمن گرووپ) و وەزارەت و لایەنە پەیوەندیدارەكانی حكوومەتی هەرێمی كوردستانی كرد، هەروەها داوای لە هاووڵاتیان كرد زیادەڕۆیی لە بەكارهێنانی ئاودا نەكەن. ئەوەشی ئاشكرا كرد كە لە بەرنامەدایە لە ئاییندەدا بەهۆی زۆربوونی ئاوی بەكارهاتوو لە شاری هەولێر، سیستەمێكی ریسایكلین و دووبارە بەكارهێنانەوەی ئاوەكە دابندرێت.
هەر لە گوتارەكەیدا سەرۆكی حكوومەت باسی لە ئاستەنگ و کێشە بۆ دروستکردن و ڕێگرییەكانی بەردەم حكوومەتی هەرێمی كوردستان كرد بۆ ئەوەی ئەم جۆرە پرۆژانە پێشكەش بە خەڵكی كوردستان نەكرێن.

ئەمەش دەقی گوتارەكەیە:

بە ناوی خودای گەورە و میهرەبان
بەڕێزان زۆر زۆر بەخێر بێن

زۆر خۆشحاڵم جارێكی تر لێرە لە خزمەتی ئێوەی بەڕێز و خۆشەویستین بۆ كردنەوەی بەشی یەكەمی پرۆژەیەكی زۆر ستراتیژی و گەورە، ئەویش پرۆژەی فریاگوزاریی خێرای گەیاندنی ئاوە بۆ شاری هەولێر.
لە چەند ساڵی رابردوو هەستمان دەكرد كە قەیرانی ئاو قەیرانێكی جددییە و خەڵك بەدەستیەوە دەناڵێنێت، لە لایەكەوە گۆڕانكاریی كەشوهەوا و نەبارینی باران، دابەزینی ئاستی ئاوی ژێرزەوی و فراوانبوونی شاری هەولێر، وایكرد كە قەیرانی ئاو ببێت بە قەیرانێك، پێویست بوو بیری جیدی لێ بكرێتەوە كە چارەسەر بكرێت. هەر ئەمەش وایكرد من داوام كرد لە كاك (خالید خۆشناو) كە ئەم ئەركە لە ئەستۆ بگرێت و ئەو پرۆژەیەی كە چەندین ساڵ بوو بەداخەوە ئەنجام نەدرا لەبەر ئەوەی كە كۆمپانیای پێشتر نەیتوانی ئەركەكەی خۆی جێبەجێ بكات، من داوام كرد و كاك خالید زۆر بە خۆشحاڵییەوە ئەركەكەی قەبووڵ كرد و گوتی ئێمە ئەوەی لە تواناماندا بێت، جێبەجێی دەكەین. بۆیە كەمتر لە ساڵێك پێش ئێستا ئێمە لێرە بووین و بەردی بناخەی ئەم پرۆژە ستراتیژییەمان دانا.

ئەم پرۆژەیەی ئێستا ئێمە بەشی یەكەمی دەكەینەوە كە بەڕاستی لە كاتێكی پێوانەیی، بە باشترین شێواز، لە لایەن كۆمپانیایەكی خۆماڵی، ئەندازیاری خۆماڵی، دیزایینی خۆماڵی و ئەوەی بیستم زۆربەی كەرەستەكانی بەكارهاتووش خۆماڵین، ئەم پرۆژەیەیان جێبەجێ كردووە. ئەمە جێی دەستخۆشییە و جێی شانازییە.
من جارێكی تریش دەمەوێ بە هەموو خەڵكی كوردستان و بە تایبەتی خەڵكی هەولێری خۆشەویست بڵێم كە كاك خالید و هێمن گرووپ بوونەتە شانازی بۆ هەموومان، جارێكی تر دەستخۆشیتان لێ دەكەم، هەر سەركەوتوو بن و نموونەتان زۆر بێت.

جێی خۆیەتی من سوپاس و دەستخۆشی لە شارەوانی و گەشتوگوزار و پارێزگای هەولێریش بكەم كە ئەوانیش بە ئەركی خۆیان هەستان و بە هەموو شێوەیەك یارمەتیی ئەم پرۆژەیەیان داوە. دەستخۆشیی لە ستافی نووسینگەی خۆیشم دەكەم كە بەردەوام بەدواداچوونیان كردووە و هەرچی پێویست بێت بۆ بەئەنجامگەیاندن و سەرخستنی ئەم پرۆژەیە، درێغییان نەكردووە.
لێرە من داوام لە خوشك و برا خۆشەویستەكانمە لە شاری هەولێر كە ئەوانیش ئەركی خۆیان بەجێ بهێنن، تكاتان لێ دەكەم ئیسراف لە بەكارهێنانی ئاو مەكەن، ئاو چەندی زۆر بێت، دەستی پێوە بگرن، پێویستیمان پێی دەبێت. ئەمە ئەركێكی هاووڵاتیانەی هەموو لایەكە كە پێویستە هەر كەسێك وەكوو خۆی یارمەتیی حكوومەت و سەرخستنی ئەم جۆرە پرۆژە خزمەتگوزارییانەش بدات. بە زۆربوونی ئاو بێگومان لەوانەیە ئاوی زۆر بكەوێتە ناوشار و پێویستیی بە چارەسەر هەبێت. بۆ ئەمەش بەرنامەمان هەیە كە بۆ ریسایكلینكردنی ئەو ئاوە و دواتر بۆ بەكارهێناوەی لە باخچەكان، لە ئاودانی سەوزاییەكان، ئەم پرۆژەیەش ئینشائەڵا بە زوویی دەخەینە كار و جێبەجێی دەكەین.

ئەمانە هەموویان ئەو پرۆژانەن كە خەڵكی شاری هەولێر پێویستییان پێیەتی و ئەركی ئێمەشە، منەتی تێدا نییە، ئەوەی لە تواناماندا بێت بۆیان جێبەجێ بكەین. حكوومەتی هەرێم هەر لە دەستپێكی كارەكانی خۆیەوە تاكوو ئێستا، هەر وەزارەتێك لە ئاستی بەرپرسیارێتیی خۆی، هەوڵی ئەوەی داوە كە حكوومەتێكی خزمەتگوزار بێت و خزمەتی خەڵكەكەی خۆی بكات، چ بابەتی ئاو و ئاوەڕۆ بێت، ڕێگەوبان بێت، كشتوكاڵ بێت، هەناردەكردنی بەروبوومی ناوخۆیی بێت، دابینكردنی كارەبای 24 كاتژمێری بێت، دابینكردنی خزمەتگوزارییە دیجیتاڵییەكان بێت، بابەتی سێكتەری بانكی بێت. وەزارەتی ناوخۆ لە ڕووی یارمەتیدانی هاووڵاتیان بۆ بەڕێوەبردن و ئاسانكردنی كاروبارەكانیان، بابەتی پۆلیسی ناوخۆ، پۆلیسی ڕێگەوبانەكان چۆن بتوانن ئاستی لێخوڕینی ئۆتۆمبێل و باشتركردنی شێوازی لێخووڕین لەسەر شەقامەكان، ئەمانە هەموویان ڕێك بخەن، بەهەرحاڵ هەر وەزارەتێك بەپێی پێداویستیی خۆی وەكوو ئەركی سەرشانی خۆی، توانیویەتی و كاری خۆی ئەنجام داوە.
زۆرجار قسەی وا دەكرێ و پرسیار دەكەن كە حكوومەتی هەرێم داهاتی ناوخۆی چی لێكردووە؟ ئێمە ناكەوینە ناو وەڵام و وەڵامدانەوەی ئەو پرسیارە نابەرپرسانەی كە بە ئەنقەست دەیانەوێ خەڵك چەواشە بكەن، تەنیا دەمەوێ بڵێم كە ئەم جۆرە پرۆژانە وەڵامی ئێمەن، ئەم پرۆژانە وەڵامی هەموو ئەو قسانەن كە خەڵكەك دەیانەوێ گومان بخەنە سەر كارە خزمەتگوزارییەكانی حكوومەتی هەرێم. ئێمە ئەم جۆرە پرۆژانە دەكەین و بە ئەركیشیان دەزانین. ئەو شتانەی كە پێویستە هەموو خەڵك لە هەموو كوردستان هەیانبێت، ئەوەیە كە خاوەنی ئاو بن و كێشەی ئاویان نەبێت، خاوەنی كارەبای 24 كاتژمێری بن، كە ئەمەش بەشێكی ترە لەو پرۆژانەی كە ئێستا لە جێبەجێكردندان.
خۆشحاڵم كە دەبینم ئێستا هەموو شاری هەولێر و بەشی زۆری شاری سلێمانی و دهۆك خاوەنی كارەبای 24 كاتژمێرین، ئێستا زیاتر لە 2 ملیۆن كەس لە كوردستان كارەبای 24 كاتژمێرییان پێ دەگات و 80٪ی خەڵكی كوردستان كەمتر لە جاران پارەی كارەبا دەدەن، مەگەر یەكێك بۆ خۆی حەزی لێ بێت زیاتر كارەبا خەرج بكات.
لە بەرنامەشدایە كە لە ساڵی داهاتوو كارەبای 24 كاتژمێری بە هەموو كوردستان بگات، هەرچەندە هەندێكجار دیسان قسەی وا دەكرێت بە حیساب كارەبای 24 كاتژمێری لەسەر حیسابی كەمكردنەوەی كارەبایە لە شوێنەكانی تر، كە بە هیچ جۆرێك ئەمە ڕاست نییە، كارەبای 24 كاتژمێری بۆ زیادكردنی كاتەكانی كارەبایە لە هەموو كوردستان، بەڵام لە هەندێك شوێن زووتر دەستی پێكراوە و هەرواشە و ناكرێت هەمووی بە یەكەوە بێت، بەڵام وردە وردە هەموو كوردستان دەگرێتەوە و ئومێدمان وایە ئیتر بابەتی كارەباش ببێتە بابەتێك لە مێژوو و خەڵك چیتر گرفتی ئەوەیان نەبێت كە كارەبای گشتی دێت یانیش دەنگی مۆلیدە و دووكەڵی مۆلیدە و كێشەكانی كە لەگەڵ ئەو بابەتە دێن، ئەوانە هەمووی ببن بە بەشێك لە مێژوو و ئیتر ئەم پێداویستییانەی كە خەڵك دەبوایە زووتر هەیانبێت، ئێستا ئێمە بتوانین بۆیان دابین بكەین.
بەشێكی تر لە سوودەكانی ئەم پرۆژەی ئاوە ئەمەیە كە ئێمە چیتر پێویست ناكات ئاوی ژێر زەوی لە شاری هەولێر بەكار بهێنین، داخستنی ئەم بیرە ئاوانە هیوادارم وا بكات كە ئاستی ئاوی ژێر زەوی جارێكی تر بەرز ببێتەوە، لە لایەكی تریشەوە بۆ دەرهێنانی ئاوی بیری ژێرزەوی دەبووایە زۆر موەلیدە بخرێنە كار، ئەوانەش هەم دووكەڵیان زۆر دروست دەكرد و ئاووهەوای شارەكەشیان پیس دەكرد. جگە لە گەیاندنی ئاو، ئەم خێرانەشی تێدایە. ئینشائەڵا دەبینین كە ئەنجامەكانی زوو دێتە بەرچاو و خەڵك دەیانبینێت.

بەڕێزان؛
من تەمەننام دەكرد ئێستا ئێمە هەر باسی دەستكەوتەكان بكەین، بەڵام پێویستە باسی گرفتەكانیش بكەین كە زۆربەی ئەو گرفتانە بەداخەوە خەتای ئێمە نین، بەڵكوو زۆرجار ئێمە باجی ئەم سەركەوتنانەمان داوەتەوە. كە ئەم جۆرە پرۆژانە ئێمە دروست دەكەین، لایەن هەیە چاوی پێ هەڵنایەت و دەیانەوێ سزای سەركەوتنی ئێمە بدەن. لە جیاتی ئەوەی پاڵپشت بن و هاوكار بن و یارمەتیمان بدەن و چاو لە ئێمە بكەن بۆ ئەوەی زیاتر خزمەتی هاووڵاتیان بكەن، دێن هاووڵاتیان سزا دەدەن، مووچەیان دەبڕن، بژێویی ژیانیان دەبڕن، بودجەی هەرێم رادەگرن و نانێرن. دەبووایە ئەمانە بەپێچەوانەوە بێت، دەبوایە ئێمە هەموومان كێبڕكێ بكەین لەسەر ئەوەی كە چۆن زیاتر خزمەتی هاووڵاتیان بكەین؟ دەبوایە زیاتر چاو لە یەكتر بكەین كە چۆن زیاتر بتوانین ژێرخانی ئابووری لە وڵاتەكەمان نەك تەنیا لە كوردستان، بەڵكوو لە شوێنەكانی تری عێراقیش باشتر بكەین. بەو ئەزموونە كەمەی كە ئێمە هەمانە، ئێستاش رایدەگەیەنم و ئامادەین، ئێمە ئامادەین كە ئەزموونی خۆمان بخەینە خزمەتی هەموو عێراق، لە هەر شوێنێك و هەر پارێزگایەكی تری عێراق ئەگەر پێویستییان پێمان بێت، بۆ ئەوەی بزانن چۆن خزمەتی هاووڵاتیان بكەن، ئێمە ئامادەین یارمەتییان بدەین. ئەوەی لێرە كراوە، ئێمە هاووڵاتیمان كردووەتە گەورەترین ئامانجی خۆمان، دەمانەوێ هاووڵاتی خۆشبەخت و سەركەوتوو و بەختەوەر بێ، كە ئەركی حكوومەت بووە ئەوەی خزمەتی هاووڵاتی بكات، بێگومان ئەنجامەكانیشی باش دەبن. چاوەڕێی ئەوە بووین دەستخۆشیمان لێ بكرێت، بەڵام ئێمە بەپێچەوانەوە ڕێگریمان لێ كراوە، قەیران دوای قەیران بۆ ئێمە دروست كراوە، بەڵام هەر نەوەستاین. بەشێكی سەركەوتنی ئێمە دەگەڕێتەوە بۆ پشوودرێژی و خۆڕاگری و پاڵپشتیی خەڵكی كوردستان و بەشەكەی تریشی بۆ دڵسۆزی و ماندووبوون و ئەو كارە باشانەی كە كەرتی تایبەت دەیكات. من سوپاسی هەموو ئەو كۆمپانیایانە دەكەم كە لەم ساڵانەی رابردوودا یارمەتیدەری ئێمە بوون و ئەم هەموو پرۆژە باشانەیان ئەنجام داوە.

بەڕێزان :
من دەزانم خەڵكی كوردستان چاوەڕێی ئەوە دەكەن مووچەكەیان كەی بۆیان دەنێردرێت لە عێراق؟ لێرەش حەز دەكەم تۆزێك بە راشكاوی لەگەڵ خەڵكی كوردستان قسە بكەم. ئێمە كیانێكی فیدڕاڵین و هەرێمی كوردستان وەكوو كیانێكی فیدڕاڵی مافی خۆیەتی كە بودجەی تایبەت بە خۆی هەبێت، كەواتە لە بودجەی گشتیی عێراق، دەبووایە بەشی بودجەی هەرێمی كوردستان تەرخان بكرێت و دامودەزگاكانی حكوومەتی هەرێم و پەرلەمانی هەرێم و چاودێریی دارایی هەرێم و خەڵكی هەرێم ئەو وەختە بڕیار لەسەر چۆنیەتیی بەكارهێنانی بودجەی هەرێمی كوردستان بدەن. بەڵام بەداخەوە هەر لایەنی ناوخۆیی لێرە سكاڵایان كرد و داوایان كرد كە بەغدا راستەوخۆ دەست وەربداتە ناو كاروباری دابەشكردنی بودجە و مووچەی هەرێم. لەوانەیە خۆشتان بیرتان بێت لە چەندین بۆنە باسیان لەوە دەكرد كە ئەگەر مووچە بگەڕێتەوە بۆ بەغدا، ئیتر كێشەی بێمووچەییمان نابێت و لە كاتی خۆی بە زیادەوە مووچە بۆ خەڵكی كوردستان دێت. ئەو وەختەش حكوومەتی هەرێمیان تاوانبار دەكرد و دەیانگوت حكوومەتی عێراق چارەسەر و فریادڕەسە، بەڵام خەتاكە هەمووی لە هەرێمە، ئێستا ئەو دەنگانە نازانم لە كوێن؟ بۆ بێدەنگن؟ ئێستاش ئەگەر قسەیەك بكەن، پاساو دێننەوە كە بۆ حكوومەتی عێراق ئێستا مووچە نانێرێت؟ كە بۆ سزای خەڵك دەدات؟ لە جیاتی ئەوەی بە خۆیاندا بچنەوە و داوای لێبووردن لە خەڵك بكەن، جارێكی تر دێن پاساو دێننەوە كە بۆ حكوومەتی عێراق مووچەی دواخستووە؟ هەر ئێمە ماینەوە وەكوو حكوومەتی هەرێم و وەكوو ئەو كەسانەی كە دڵسۆزن بۆ پرسەكانی خەڵكی كوردستان، جارێكی تر لەگەڵ بەغدا بكەوینە گفتوگۆ و بەردەوام بین لەوەی كە ڕێگەچارەیەك بۆ ئەم پرسە بدۆزینەوە. چەندین جار شاندی هەرێم سەردانی بەغدایان كرد و شاندی بەغدامان داوەت كرد كە بێن سەردانی ئێمە بكەن، لە ڕووی تەكنیكی و هونەری و یاسایی و بە هەموو جۆرێك، هیچ نەما قسەی لەسەر نەكرێت. هەموو جارێكیش بەڵێنمان لە حكوومەتی فیدڕاڵی وەردەگرت كە بەڵێ كێشەكان چارەسەر بوون و ئیتر شتێك بە ناوی پرسی مووچە نامێنێت، بەڵام مانگێك دوو مانگی نەدەخایاند و دیسان بیانوویەكی نوێ مووچەكانی دوادەخستەوە. دیسان دەستمان دەكردەوە بە ناردنی شاند و گفتوگۆ، هەمیشەش بەڵێنی ئەوەمان پێ دەدرا كە ئێمە مووچەكان دەنێرین بەڵام كێشەیەكی فەنی هەیە، دواتر هەندێكجار خەتایان دەخستە سەر ملی هەرێمی كوردستان و گوایە ئێمە نەوت نانێرین یان داهاتی ناوخۆ رادەست ناكەین.
تێگەیشتنی ئێمە بۆ رادەستكردنی داهاتی ناوخۆ بەپێی دەستوورە، دەستوور دەڵێ 50٪ی داهاتی فیدرالی رادەستی حكوومەتی فیدرالی بكرێتەوە، هەمیشە حكوومەتی هەرێمی كوردستان پابەند بووە و ئەم ئەركەشی جێبەجێ كردووە. جگە لەو كاتانەی كە حكوومەتی فیدڕاڵ مووچەی نەناردووە، یان بە كەمی ناردوویەتی كە ئێمە ئەو وەختە ناچار بووین داهاتە ناوخۆییەكان بۆ تەكمیلەی مووچە بەكار بهێنین.
دەڵێن نابێت ئێوە هیچ جۆرە داهاتێكتان هەبێت، هەر هیچ هیچ، هەرچی هەتانە رادەستمان بكەن، بۆ ئەوەی ئەم جۆرە پرۆژانەمان پێ جێبەجێ نەكرێت. بەڵام ئێمە دەستوورێكمان هەیە و مافی دەستووریمان هەیە. ئەوەی ئەركی ئێمەیە جێبەجێی دەكەین بە زیادەوە و كردووشمانە، لەمەودواش پابەندین بە جێبەجێكردنی هەر ئەركێكی دەستووری كە دەكەوێتە سەر حكوومەتی هەرێمی كوردستان، بەڵام ئامادە نین واز لە مافە دەستوورییەكانی خۆمان بهێنین. ئێمە لەبەر ئەوە بەردەوام دەبین لەوەی كە ئەركەكانی خۆمان جێبەجێ بكەین و مافە دەستوورییەكانی خۆشمان بپارێزین. بەڵام لە هەمان كاتدا ئەوپەڕی مروونەتیشمان نیشان داوە لە زۆر شتدا و زیاتریش هاتووینەتە پێشەوە تەنیا بۆ ئەوەی خەڵك لەژێر ئەم فشاری مووچە و پاڵەپەستۆی مووچەدا نەمێنێت. دواجار شاندێكی هاوبەشی پارتی و یەكێتی چوونە بەغدا و لەسەر ئەو پێشنیارەی كە دواپێشنیار بەغدا كردی بەحیساب بۆ رادەستكردنی بەشێك لە نەوتەكە و ژمارەیەكی دیاریكراوی رادەستكردنی داهاتە ناوخۆییەكان كە بەحیساب ئەمە دوا بیانوویان بێت. شاندەكە لە بەغدا بوون هەر ئەو شەوە، بەڕێز كاك بافڵ و بەڕێز دكتۆر فوئاد حسێن، وەزیرە بەڕێزەكانی تر، تەلەفۆنیان بۆ كردم. گوتیان ئێمە لەسەر ئەم پێشنیارە گفتوگۆیەكی چڕمان لەگەڵ هەموو لایەنەكان كردووە و ئەمە پێشنیارەكەیە و لەمە زیاتر لەم مەرحەلەیە زەحمەتە و حەز دەكەین لەسەر ئەم ڕێككەوتنە تۆش رازی بیت و ئیتر بیانوو بە دەستی كەسەوە نەمێنێت و ئەم خەڵكەش لەژێر ئەم فشارە دەربێت. گوتم باشە بەسەرچاو، رازیم بەوەی كە 230 هەزار بەرمیل نەوت رادەستی حكوومەتی فیدڕاڵی بكرێت و بە ڕێگەی سۆمۆ بفرۆشرێ و 120 ملیار دیناریش لە داهاتی نانەوتی یان داهاتی ناوخۆیی رادەستی حكوومەتی فیدڕاڵی بكرێت، بە حیساب سیستەمی تەوتینیش جێبەجێ بكرێت كە ئەمەش بەشێكە لەو ئەركەی حكوومەتی هەرێم لەمێژەوە جێبەجێی كردووە. بابەتی هەژماری من زۆر زۆر خزمەتگوزارییەكانی لە بابەتی تەوتین زیاترە و زیاتر لە 900 هەزار كەس ئێستا لەم پرۆژەیە بەشدارن.
بەهەرحاڵ ئەو ئەركانەی كە لەسەر شانی ئێمە بوو، قەبووڵمان كرد، بەڵام ئەو كاتەش هاوكات بوو لەگەڵ پەلاماردانی كێڵگە نەوتییەكان بە ڕێگەی درۆنەوە، پێم گوتن، گوتم باشە بەڵام بەم هێرشەی كە دەكرێتە سەر كێڵگەكانمان، بەشی نەوت كەمتر دەبێت چونكە ئێستا كۆمپانیاكان هەموویان لێیان دراوە و ناتوانن ئەوەندە نەوت بەرهەم بهێنن، ئەی ئەمە چی لێ دێت؟ هیوادارم ئەمەش نەبێتە بیانوویەكی تر بۆ نەناردنی مووچە، گوتیان نا ئەمە تێگەیشتن هەیە و ئەكید ئەگەر ئێمە لەسەر بنەماكە پێكبێین ئیتر حكوومەتی فیدڕاڵی مووچە دەنێرێت. لەسەر ئەو ئەساسە ئێمە چاوەڕێ بووین. دوای ئەوەی كە ئێمە رەزامەند بووین لەسەر ڕێككەوتنەكە و واژۆشمان كرد لەسەر پێشنیازەكان لەسەر ئەو تێگەیشتنە، خاڵێكی تریان زیاد كردووە، بەهەرحاڵ ئەمەش بابەتێكە كە چاوەڕێین بزانین ئەوان چۆن مامەڵەی لەگەڵ دەكەن. لەسەر ئەوەی كە 230 هەزار بەرمیلەكە تاوەكوو وەرنەگیرێت مووچە نادرێت، لە لایەكی تریشەوە ئەو تیرۆریستانە دێن كێڵگەكانمان دەتەقێننەوە و بەرهەمی نەوت ناهێڵن، ئێ چۆن دەكرێت؟ گوتیان شاندێك دەنێرین بۆ ئەوەی بێن مەیدانییەن بچن و ببینن چی كراوە؟ هاتن، شاندەكە وابزانم دوێنێ راپۆرتی خۆیان بەرز كردووەتەوە دیسان بۆ حكوومەتی فیدڕاڵی كە تەنیا ئێستا ئەوەندە نەوتە بەردەستە تاوەكوو ئاسەواری ئەم هێرشانە چارەسەر دەكرێ. هیوادارین رۆژێك بەرهەمهێنانی نەوت بگات بە ئاستێكی زۆر بەرز، ئەگەر كێشەی ئەمنی نەمێنێت، ئێمە هیچ كێشەمان نییە لە هەناردەكردنی هەموو نەوتی كوردستان جگە لەو پێداویستییە ناوخۆییەی كە ئێمە پێویستیمان پێیەتی بۆ دابینكردنی بەنزینە، كارەبایە، سووتەمەنییە، پێداویستییەكانی خەڵكە. جگە لەوە، ئەوەی تر ئێمە ئامادەین بینێرین و هیچ كێشەمان لەگەڵ ئەو كێشەیە نییە.
ئنجا بۆ ئەوەی ئێوەی بەڕێز و خۆشەویست بزانن، ئێمە ئێستا چاوەڕێی بەغدا دەكەین و هیوادارین ئیتر مووچەی ئەم خەڵكە بنێردرێ و ئەم سزادانە بەكۆمەڵە كۆتایی بێ و ئەم بڕیارە نادەستووری و نایاساییەی بڕینی مووچەی خەڵكی كوردستان كۆتایی بێ و مووچەی ئەم خەڵكە بنێرن.

لە زۆر شوێن لەوانەیە خەڵكی تر هەبن كە گلەیی دەكەن و دەڵێن بەشێكی ئەم كێشەیە لەوانەیە خەتای هەرێمی كوردستان بێت، بەڵام لێرەدا من حەز دەكەم ئەمڕۆ زۆر بەڕاشكاوی لەگەڵ خەڵكی هەرێمی كوردستان قسە بكەم. لە زۆر ڕێگەی ترەوە، لە زۆر شوێنی ترەوە جیاكاری كراوە لە رەفتاركردن بەرامبەر بە خەڵكی كوردستان. لەم ساڵانەی رابردوو سێ ملیۆن و 500 هەزار كەس لە عێراق دامەزراون، یەك كەسیشیان بۆ هەرێمی كوردستان نەبووە. لە چاودێریی كۆمەڵایەتی حەفت ملیۆن كەس لە عێراق مووچە وەردەگرن، تەنیا 72 هەزاریان لە كوردستانە، 1% دەكات. ئەگەر بەپێی رێژەیی بێت، دەبوایە ئێمە ئێستا 14٪ لە هەموو شتەكان بەر هەرێمی كوردستان بكەوێت. 50 ملیار دۆلار قەرزی نێودەوڵەتی لە عێراق وەرگیراوە بەحیساب بۆ پرۆژەكان، هیچی هەرێم لێی سوودمەند نییە، بەڵام لە دانەوەی قەرزەكان لە بەشی هەرێم دەدرێتەوە. لە زۆر رووەوە ئەگەر تەماشا بكەن ئەم جۆرە پێشێلكارییانەی كە دەكرێت، بەرهەمی كشتوكاڵیی ناوخۆی هەرێمی كوردستان، ڕێگری دەكرێت لەوەی، هەر جارەی بە بیانوویەك، بۆ شارەكانی تری عێراق بڕوات. هەموو جارێك بە سەرئێشە و بە كێشە و بە گرفتی چەند هەفتە و مانگ، تاكوو جارێكی تر چارەسەری ئەم كێشەیە دەكرێتەوە. بڕیاری دروستكردنی دوو هەزار قوتابخانە لە عێراق دراوە، یەكێكیشیان بۆ هەرێمی كوردستان تەرخان نەكراوە. بڕیاری دروستكردنی 150 نەخۆشخانە لە عێراق دراوە، یەكێكیشیان بۆ هەرێمی كوردستان تەرخان نەكراوە. دەبێ ئێمەش هیچ داهاتێكی ناوخۆییمان نەبێت!، خۆمان هیچ نەكەین و ئەوانیش هیچمان بۆ نەكەن، چۆن دەكرێت؟
من باسی سیاسەت ناكەم و باسی ئەو كەسانەش ناكەم كە هەرچی بكەیت، ئەوان تەنیا بڕیارێكیان هەیە كە پاساو بێننەوە بۆ ئەوەی دژایەتیی حكوومەتی هەرێم بكەن، من ڕووم لە خەڵكی كوردستانە بۆ ئەوەی خەڵكی كوردستان قەناعەتیان هەبێت، ئەوەی ئێمە دەیكەین تەنیا و تەنیا لە پێناو خزمەتكردنی ئێوە و سەربەرزیی ئێوەیە. بەردەوامیش دەبین لەوەی كە داكۆكی لە هەموو مافی خەڵكی كوردستان بكەین و هەموو مروونەتێكیشمان پێشان داوە و بەردەوام دەبین لەگەڵ حكوومەتی فیدڕاڵی بۆ دابینكردنی شایستە داراییەكانی خەڵكی كوردستان، بەڵام بە شێوەیەكی سەربەرزانە.
من جارێكی تر، سوپاسی هێمن گرووپ دەكەم بۆ سەرخستنی ئەم پرۆژە گەورەیە، جێبەجێكردنی ئەم پرۆژە گەورەیە، خوا پشتیوان بێت، خەڵكی كوردستانیش پشتیوانمان بن، بەردەوام بن لەوەی كە متمانەیان بە ئێمە هەبێت، ئێمە پرۆژەی وەكوو ئەمە و هاوشێوەی ئەمە و لەمەش گەورەتر لە سەرانسەری كوردستان جێبەجێ دەكەین.

ئێوە هەر سەربەرز و سەربڵند بن، كوردستانیشمان هەر ئاوەدان بێت.