دەزگای گشتیی کاروباری مین ئاماری کاروچالاکییەکانی ساڵی ڕابردووی ڕاگەیاند
ڕۆژی چوارشەممە ٨ی کانوونی دووەمی ٢٠٢٥، جەبار مستەفا، سەرۆکی دەزگای گشتیی کاروباری مین، لە کۆنگرەیەکی ڕۆژنامەوانیدا، ئاماری کاروچالاکیی ساڵی ٢٠٢٤ی ڕاگەیاند و گوتی: لەو ساڵەدا بە هەوڵە بەردەوامەکانی تیمەکانی مینلابه‌ری دەزگای مین و ڕێكخراوه نێوده‌وڵه‌تییه‌كان تواندراوە ڕووبەری نزیکەی سێ ملیۆن مەتردووجا لە مین و تەقەمەنی پاک بکرێتەوە، کە بەراورد بە ساڵی ٢٠٢٣، ڕووبه‌ری پاككراوە زیاد بووە، ئەمەش خۆی لە ٣٦ کێڵگەمین و ٧١ شەڕگە دەبینێتەوە. دوای پاککردنەوەشیان ڕادەستی خاوەنەکانیان کراونەتەوە و لە ئێستادا دەتواندرێت بۆ کاری کشتوکاڵ، ئاژەڵداری، پرۆژەی ئابووری، وەبەرهێنان و نیشتەجێبوون به‌کاربهێندرێن و هیچ مەترسییەکیان لەسەر نەماوە.
سەرۆکی دەزگای گشتیی کاروباری مین باسی لە ژمارەی ئەو مین و تەقەمەنییانە کرد، کە لە ڕێگەی تیمەکانی مینلابەری دەزگا و ڕێکخراوەکانەوە هەڵگیراونەتەوە و لەناوبراون، کە ژمارەیان بریتی بووە لە ٢٥ هەزار و ٣٣٧ پارچە، کە مەترسی بوونە بۆ سەر گیانی هاووڵاتی، گیانلەبەران و ژینگە.
جەبار مستەفا ئاماژەی بە ژمارەی شەهید و برینداران کرد، کە لە ساڵی ڕابردوودا بەهۆی مین و تەقەمەنییەوە بوونەتە قوربانی و ڕایگەیاند؛ لە ساڵی ٢٠٢٤دا یازدە بەرکەوتوو بە ڕووداوەکانی مین و تەقەمەنی تۆمارکراون، لەو ژمارەیەشدا بەداخەوە چوار بەرکەوتوو گیانیان لەدەست داوە و حەوت بەرکەوتووش بریندار و کەمئەندام بوون. لەگەڵ ئەوەشدا ژمارەی قوربانییانی مین و تەقەمەنی لە سەرتاسەری کوردستان خۆشبەختانە بەراورد بە ساڵی ٢٠٢٣ کەمی کردووە.
سەبارەت بە ژمارەی سودمەندبووان لە بەرنامەی هۆشیارکردنەوە لە مەترسییەکانی مین و تەقەمەنی، سەرۆکی دەزگە باسی لەوە کرد کە ٧٢ هەزار و ٤٠٦ کەس لەو ساڵەدا لە مەترسییەکانی مین و تەقەمەنی هۆشیار کراونەتەوە.