پەیامێک بەبۆنەی ساڵیادی جینۆسایدی ئەنفال
![](/media/5639/danaabdulkarem.jpg?center=0.27794561933534745,0.560126582278481&mode=crop&width=1200&height=630&rnd=132628935890000000)
ئەمڕۆ یادی (٣٣) ساڵەی شاڵاوەکانی ئەنفال کردنی خەڵکی کوردستانە، یادی ئەو ئازیزانەمانە کە بەشێوەیەکی دڕندانەو نامرۆڤانە لەلایەن رژێمی بەعسەوە کۆمەڵکوژ کران.
هەولێر، هەرێمی کوردستان، عێراق (GOV.KRD)- ئەنفال کە بە ھەشت قۆناغ ئەنجامدرا پرۆسەیەکی رژێمی دیکتاتۆری لەناوچوی بەعس بوو، ئامانج لێی قڕکردن و سڕینەوەو لەناوبردنی ناسنامەی نەتەوایەتی کورد بوو، لەئەنجامدا ھەزاران ھاوڵاتی بێتاوان لە منداڵ و ژن و پیاو و گەنج و پیر کۆمەڵکوژ و زیندەبەچاڵ کران، ئەمەجگە لە خاپورکردنی ھەزاران گوند و شارو ناوچەو تەختکردنیان لەگەڵ زەوی و ھەڵتەکاندنی بنەماکانی ژیان لە کوردستان.
ئەنفال، برینێکی قوڵ و زامێکی ساڕێژ نەبووە، یەکێکە لە دڕەندەترین ئەو تاوانانەی کە لە مێژودا دژ بە مرۆڤایەتی کراوە. لەم بۆنە خەمناکەدا، درود و سڵاو بۆ گیانی پاکی شەھیدان و قوربانیانی ئەنفال و تێکڕای شەھیدانی کوردستان دەنێرین، وێڕای جەخت کردنەوەش لەسەر خزمەتکردنی تەواوی ناوچەکانی کوردستان و ئاوەدانکردنەوەیان، ھاوکات پاڵپشتی و پشتیوانی خۆمان بۆ خزمەتکردنی زیاتری کەسوکاری قوربانیانی شاڵاوەکانی ئەنفال و تێکڕای کەسوکاری شەھیدان دوپات دەکەینەوە.
دانا عەبدولکەریم
وەزیری ئاوەدانکردنەوەو نیشتەجێکردن
٢٠٢١/٤/١٤