وۆرکشۆپی "بنیادنانی تواناکان لەسەر ئامرازەکانی لێکۆڵینەوە" له كاره‌كانى به‌رده‌وامه
ڕۆژی پێنجشەممە ٥ی کانوونی یەکەمی ٢٠٢٤، لە دانیشتنی یەکەمی وۆرکشۆپی "بنیادنانی تواناکان لەسەر ئامرازەکانی لێکۆڵینەوە"، دکتۆر هیشام نەسر، پسپۆڕی باڵای لێکۆڵینەوە و دادوەری، بابەتێکی نوێی بە ناونیشانی (لێکۆڵینەوە لە تاوانە ئەلیکترۆنییەکان) پێشکەش کرد و دووپاتی لەوە کردەوە کە: بۆ لێکۆڵینەوە لە تاوانە ئەلیکترۆنییەکان، پێویستە لێکۆڵەر بۆ گەیشتن بە بەڵگە و سەلماندنی تاوانەکە، پرۆسەی بەدواداچوونی بەرەودوا جێبەجێ بکات، لەناو مۆبایل یان کۆمپیوتەری تاوانلێکراودا، هەروەها ڕایگەیاند: ئەو یاسایەی کە هەرێمی کوردستان هەیەتی (یاسای ژمارە (٦) ی ساڵی ٢٠٠٨، یاسای قەدەغەکردنی خراپبەکارهێنانی ئامێرەکانی پەیوەندیکردن، تاكوو ئێستا عێراق نییەتی، گوتیشى: هەرچەندە یاساکە تایبەت نییە بە تاوانە ئەليکترۆنییەکان، بەڵام یاسایەکی باشە و لە مادەکانی (٢،٣،٦)، بە دەق باسی خراپبەکارهێنانی ئینتەرنێتی کردووە و سزای بۆ داناوە.
بابەتی دووەمى وۆركشۆپه‌كه بە ناونيشانى ( دادگەريی ئەليکترۆنی و بەڵگەی دیجیتاڵی)، لەلایەن دادوەر (دادیار حەمید سلێمان)ه‌وه پێشکەش کرا.
كه باسی له دادگه ئەليکترۆنییەکانی وڵاتانی ئەمه‌ریکا، ئیمارات و ئوردون کرد، کە چۆن لەو وڵاتانه پرۆسەی دادبینی، لێکۆلینەوە، حوکمدان و سەلماندنی بەڵگەی ئەليکترۆنی، ته‌نانه‌ت جیابوونەوەی هاوسه‌ره‌كانيش لە ڕێگەی ئەليکترۆنییەوە ئەنجام دەدرێت و واژۆى ئەليکترۆنی هەیە.
ناوبراو گوتيشى: هەبوونی دادگه‌ی ئەليکترۆنی بە مانای تەواوبوونی لاپەرەکان نییە، بەڵکوو سوودوەرگرتنی زیاترە لە سیستمە ئەليکترۆنییەکان، هەروەها دانانی یاسای تایبەتی نوێی پێویستە. ئاماژەی بەوە دا کە: لە قۆناغی پێشکەوتووی دادگه‌ی ئەليکترۆنیدا، هەموو کەس دەتوانێت، دانیشتنی ئەو دادگەرییانە ببینێت کە ئاشکران، لە ڕێگەی ئینتەرنێت و ئۆنلاینەوە. جگه له‌وه‌ى سیستمەکە پرۆسەی دادگاییکردن خێراتر دەکات.
