له ديوانى وه‌زاره‌تى داد كۆبوونه‌وه‌يه‌كى هاوبه‌ش به‌ڕێوه‌چوو
ڕۆژى پێنجشه‌ممه ٢٧ى شوباتى ٢٠٢٥، سۆزان ڕەشید ئەحمەد، بەڕێوه‌بەری گشتيی دیوانی وەزارەتی داد، به ئاماده‌بوونى ڕزگار مەحموود، بەڕێوه‌بەری یاسایيی فەرمانگەی پەیوەندییەکانی دەرەوە و هاوڕێ بەختیار، نوێنەری بەڕێوەبەرایەتيی گشتيی باجەکان و خانووبەرەی میری و محەمەد سلێمان عەزیز، نوێنەری بەڕێوەبەرایەتیی گشتيی تۆمارکردنی کۆمپانیاکان، سەرپەرشتيی کۆبوونەوەیەکی کرد، کە بە مەبەستی هاوکاری و هەماهەنگی نێوان دامەزراوەکانی حکومەتی هەرێمی کوردستان ڕێكخرابوو، بۆ باشتر ڕاییکردنی کاروباری هاووڵاتيیان، لەکاتی پەسەندکردنی بەڵگەنامە فەرمییەکان.
لە کۆبوونەوەکەدا گفتوگۆ لەباره‌ى هەماهەنگيی زیاتری نێوان دامودەزگه‌کانی هەرێمی کوردستان و پێشکەشکردنی خزمەتی زیاتر و باشتر بە هاووڵاتیيان و کەمکردنەوەی ڕۆتین کرا، هه‌روه‌ها بەئەلیکترۆنیکردنی مامەڵەی هاووڵاتیان، بە تایبەت پرۆسەی پەسەندکردن و بەئەلەکترۆنیکردنی ڕاستاندنی بەڵگەنامەکان لە دیوانی وەزارەتی داد، باسی لێوە کرا.
