بۆ تاووتوێکردنى پرسى دارایىی زانکۆکانى کوردستان وەزیرى خوێندنى باڵا لەگەڵ وەزیرى دارایى کۆ بووەوە
ڕۆژی چوارشەممە، ڕێکەوتى ٢٦ى تەممووزی ٢٠٢٣، د. ئارام محەمەد قادر، وەزیرى خوێندنى باڵا و توێژینەوەى زانستى، سەردانى وەزارەتى دارایى کرد و لە لایەن ئاوات شێخ جەناب، وەزیرى دارایىی حکومەتى هەرێمى کوردستان پێشوازیی لێ کرا.
لە دیدارێکدا کە بەڕێوەبەرى گشتیی بانکى هەرێم لە هەولێر و بەڕێوەبەرى گشتیی دیوانى وەزارەتى خوێندنى باڵا ئامادەی بوون، گفتوگۆ لەبارەى پرسە داراییەکانى وەزارەت و زانکۆکانى کوردستان کرا، بۆ ئەمەش وەزیرى خوێندنى باڵا ڕایگەیاند: "هاتووین لە نزیکەوە سوپاس و پیزانینی خۆم و وەزارەتی خوێندنی باڵاتان پێ ڕابگەیەنم بۆ هەموو هاوکاری و پشتیوانییە بەردەوامەکانتان بۆ وەزارەتەکەمان".
وەزیرى دارایى جەختى لە هاوکارى و پشتیوانیى بەردەوامى وەزارەتەکەى کردەوە بۆ کارەکانى وەزارەتى خوێندنى باڵا، لەو چوارچێوەیەشدا گوتى: "کارەکانتان گرنگ و پڕ بایەخن بۆ خزمەتکردنی خوێندکاران و قوتابیانی هەرێمەکەمان و بەرزکردنەوەى ئاستى زانستى و ئەکادیمیی دامەزراوەکان و زانکۆکان لە هەرێمى کوردستان، هەر بۆیە وەک هەمیشە پاڵپشت و پشتیوانتان دەبین و هەر کارێک لە چوارچێوەی دەسەڵات و تواناماندا بێت درێغی ناکەین".
وەزیرى خوێندنى باڵا داواى لە وەزیرى دارایى کرد بۆ تەواوى مانگەکانى ساڵى ئەکادیمیی داهاتوو پاڵپشتیى دارایى قوتابیان و خوێندکاران بەردەوام بێت و هەوڵ بدرێت کێشەى نەختینەى بانکى دروست نەبێت و ئەو بانکانەشى ئەو کێشەیان هەیە چارەسەر بکرێت، هەروەها ئاسانکارى بکرێت بۆ دابەشکردنى ئەو بڕەپارەیەی کە پاڵپشتیی قوتابیان و خوێندکارانی زانکۆکانن بۆ ئەمساڵی خوێندن وهێشتا وەریان نەگرتوە، هیمەت بکەن گەنجینە و بانکەکان دەست و بردی تەواو بکەن بۆ پێدانی شایستە داراییەکانی قوتابیان و خوێندکاران، بۆ ئەمەش وەزیرى دارایى دووپاتی کردەوە وەزارەتەکەیان هەوڵ دەدات بە بێ کێشە پاڵپشتیی داراییی قوتابیان و خوێندکاران، مانگانە لە کاتى خۆیدا خەرج بکرێت".
لە کۆتاییی کۆبوونەوەکەدا، هەردوو لا جەختیان لەسەر پەرەپێدان و بەردەوامیی هاوکاری و هەماهەنگییەکانی نێوانیان کردەوە.