هەولێر، هەرێمی کوردستان، عێراق (GOV.KRD)- بە پێي رێنماییەكانی تەندروستی و بە گرتنەبەری ھەموو رێكارە خۆپارێزییەكان، ئەمڕۆ 27-7-2021، تاقیكردنەوەكانی نیوەی ساڵی قۆناغی دووەمی خولی چوارەمی خوێندن لە پەیمانگەی دادوەریی دەستی پێكرد كە بیست رۆژ دەخایەنێت . 

لەوبارەیەوە، دادوەر دكتۆر/ عوسمان یاسین عەلی، بەڕێوه‌بەری گشتیی پەیمانگەی دادوەریی لە ھەرێمی كوردستان  رایگەیاند  "بە گرتنبەری ھەموو ڕێنماییەكانی خۆپارێزی لە بەستنی دەمامك و دوورخستنی كورسییەكانی قوتابیان لەیەكەوە، تاقیكردنەوەكان دەستی پێكردووە، ھەرچەندە دە تاقیكردنەوەیە بەڵام بیست رۆژ دەخایەنێت، چونكە لەبەر بەرژەوەندی قوتابیەكان تاقیكردنەوەكان رۆژناڕۆژێك ئەنجام دەدرێن .  

بەڕێوبەری گشتی پەیمانگەی دادوەریی، ھەروەھا گوتی " ژمارەی ئەو قوتابیانەی لەو تاقیكردنەوانەدا بەشدارن، 60 قوتابین كە 24  ئافرەت و 36  پیاون".  

شایانی باسە پەیمانگای دادوەری بەپێی یاسای ژمارە حەوتی ساڵی ٢٠٠٩ دامەزراوە و لەمانگی ٣ ی ساڵی ٢٠١٢ پەیمانگاکە دەستبەکاربووە بۆ ئامادەکردنی دادوەران و ئەندامانی داواکاری گشتی لە ھەرێمی کوردستاندا ، كە تا ئێستا سێ خول لە دادوەران و ئەندامانی داواكاری گشتی لەو پەیمانگەیەدا دەرچوون و دەست بەكاربوون، لە یەکەمین خولیشیدا ٧٣٠ کەس لە پارێزەرەکان و مافپەروەران ناویان لەو پەیمانگایە بۆ خوێندن تۆمارکردبوو، بەڵام دوای چەند تاقیکردنەوەیەک لەو ژمارەیە تەنیا ٤١ کەسیان وەرگیران و دواتر بڕوانامەیان بەدەستھێنا. جێگای وەبیر ھێنانەوەیە لە کاتی پێویستتدا بۆ ئامادەکردنی دادوەران و ئەندامانی داواکاری گشتی، پەیمانگای دادوەری خولی ئامادەکردن ئەنجام دەدات.